കോന്നി: തണ്ണിത്തോട്ടില് അനധികൃതമായി പച്ചമണ്ണ് കടത്തിയ സംഭവത്തില് ടിപ്പര് ലോറിയും ജെസിബിയും പോലീസ് പിടിച്ചെടുത്ത് മൈനിങ് ആന്ഡ് ജിയോളജി വകുപ്പിന് റിപ്പോര്ട്ട് കൈമാറി. തണ്ണിത്തോട് അശോക വിലാസം അജേഷിന്റെ ഉടമസ്ഥതയില് ഉള്ള മണ്ണുമാന്തിയും തണ്ണിത്തോട് സ്വദേശി നെടുംപുറത്ത് വീട്ടില് ബിജുവിന്റെ ഉടമസ്ഥതയിലുള്ള ടിപ്പര് ലോറിയുമാണ് പോലീസ് പിടികൂടിയത്. തണ്ണിത്തോട് മായപ്പടിയില് നിന്നും കൂത്താടിമണ് ഭാഗത്തേക്ക് പാസ്സ് ഇല്ലാതെ പച്ചമണ്ണ് കടത്തുന്നതിനിടെ ആണ് സംഭവം. പിടിച്ചെടുത്ത വാഹനങ്ങള് പോലീസ് കസ്റ്റഡിയില് സൂക്ഷിക്കും. പച്ചമണ്ണ് കടത്തുന്നത് പോലീസ് നിരീക്ഷിക്കുന്നുണ്ടോ എന്ന് അറിയുന്നതിനായി മണ്ണ് കടത്തിയവര് ആളുകളെ നിയോഗിച്ചിരുന്നതായി പറയപ്പെടുന്നു. തണ്ണിത്തോട് ഗ്രാമ പഞ്ചായത്തിന്റെ വിവിധ ഭാഗങ്ങളില് അനധികൃതമായി പച്ച മണ്ണ് കടത്തുന്ന സംഭവങ്ങളും അനധികൃതമായി പാറ പൊട്ടിച്ച് മാറ്റുന്ന സംഭവങ്ങളും വ്യാപകമായിരുന്നു.
പഞ്ചായത്തിലെ പല ഭാഗങ്ങളില് നിന്നും നിര്മ്മാണ പ്രവര്ത്തനങ്ങളുടെ ഭാഗമായാണ് മണ്ണും പാറയും കടത്തുന്നത്. പലപ്പോഴും ബന്ധപ്പെട്ട അധികൃതര് ഇതിനെതിരെ നടപടി സ്വീകരിച്ചിരുന്നില്ല. സ്വകാര്യ വ്യക്തികളുടെ ഭൂമിയില് നിന്നും എടുത്തുമാറ്റുന്ന പച്ചമണ്ണും പാറയും ഇവര് വലിയ തുകകയ്ക്ക് വിറ്റഴിക്കുകയും ഇതുവഴി വലിയ ലാഭമുണ്ടാക്കുകയും ചെയ്തിരുന്നു. തണ്ണിത്തോട്ടില് റിസോര്ട്ട് നിര്മ്മാണത്തിന്റെ മറവിലും വലിയ തോതില് ഖനനം നടന്നിരുന്നു. മഴ ശക്തമായ സമയങ്ങളില് നടക്കുന്ന ഇത്തരം ഖനനങ്ങള് ജനങ്ങള്ക്ക് വലിയ ഭീഷണിയാണ് ഉയര്ത്തുന്നത്. പൊട്ടിച്ച് മാറ്റുന്ന പറയും പച്ചമണ്ണും രാത്രികാലങ്ങളില് കടത്തിക്കൊണ്ട് പോയി ആളൊഴിഞ്ഞ പ്രദേശങ്ങളില് കൂട്ടിയിട്ടതിന് ശേഷം വില്പന നടത്തുന്നതാണ് ഇവരുടെ രീതി. തണ്ണിത്തോട് പഞ്ചായത്തിലെ ഉള്പ്രദേശങ്ങള് കേന്ദ്രീകരിച്ചാണ് ഇവര് പാറ പൊട്ടിച്ച് മാറ്റുന്നതും പച്ച മണ്ണ് കടത്തുന്നതും എന്നാണ് പൊതുജനങ്ങള് പറയുന്നത്.
