ഇടുക്കി: കഴിഞ്ഞ രാത്രിയിലും ഇന്ന് പുലർച്ചെയും മഴ മാറിനിൽക്കുന്നുണ്ടെങ്കിലും അണക്കെട്ടുകളിൽ ജലനിരപ്പ് ഉയർന്ന നിലയിൽ തുടരുന്നത് ഇടുക്കി ജില്ലയിൽ ആശങ്കയ്ക്കിടയാക്കുന്നു. മലങ്കര അണക്കെട്ടിന്റെ ഷട്ടറുകൾ കൂടുതൽ തുറന്ന പശ്ചാത്തലത്തിൽ മൂവാറ്റുപുഴ, തൊടുപുഴ ആറുകളുടെ തീരത്ത് താമസിക്കുന്നവർ കനത്ത ജാഗ്രത പുലർത്തണമെന്ന് അധികൃതർ നിർദേശിച്ചു. നിലവിൽ മലങ്കര, കല്ലാർകുട്ടി, പാമ്പള അണക്കെട്ടുകളാണ് തുറന്നിരിക്കുന്നത്. ഇടുക്കി അണക്കെട്ടിൽ 2346.84 അടിയും മലങ്കരയിൽ 40.96 അടിയും കല്ലാർകുട്ടിയിൽ 456.50 അടിയുമാണ് നിലവിലെ ജലനിരപ്പ്. മലങ്കര അണക്കെട്ടിലെ ജലനിരപ്പ് ഭാഗികമായി ക്രമീകരിക്കാൻ സാധിച്ചതിനെത്തുടർന്ന് ഇന്ന് പുലർച്ചെയോടെ ഷട്ടറുകൾ താഴ്ത്തിയിട്ടുണ്ട്. ജില്ലയിൽ 13 ദുരിതാശ്വാസ ക്യാമ്പുകൾ പ്രവർത്തിക്കുന്നുണ്ട്. 200 ഓളം പേരാണ് നിലവിൽ ഈ ക്യാമ്പുകളിൽ കഴിയുന്നത്.
ജില്ലയിൽ ഓറഞ്ച് അലർട്ട് നിലനിൽക്കുന്ന സാഹചര്യത്തിൽ മുൻകരുതൽ നടപടിയുടെ ഭാഗമായി വിദ്യാഭ്യാസ സ്ഥാപനങ്ങൾക്ക് ജില്ലാ കലക്ടർ അവധി പ്രഖ്യാപിച്ചിട്ടുണ്ട്. കളക്ടറും ജനപ്രതിനിധികളും നേരിട്ടെത്തി ദുരിതാശ്വാസ ക്യാമ്പുകളുടെ പ്രവർത്തനം വിലയിരുത്തുന്നുണ്ട്. ദുരന്തബാധിതരായ ആളുകളുടെ പുനരധിവാസത്തെക്കുറിച്ചുള്ള ആലോചനകളും നടക്കുന്നുണ്ട്.
