തിരുവല്ല : തിരുവല്ല റെയിൽവേ സ്റ്റേഷൻ പരിസരത്ത് പാർക്ക് ചെയ്തിരുന്ന വാനിന് തീപിടിച്ചു. പുലർച്ചെ ഏകദേശം 5.30ഓടെയായിരുന്നു സംഭവം. സ്റ്റേഷനിലെ പാർക്കിംഗ് ഗ്രൗണ്ടിൽ നിർത്തിയിട്ടിരുന്ന വാനിന്റെ അടിഭാഗത്തുനിന്നാണ് തീ ഉയർന്നത്. സംഭവം ശ്രദ്ധയിൽപ്പെട്ട ഓട്ടോറിക്ഷ ഡ്രൈവർമാർ ഉടൻ തന്നെ റെയിൽവേ ഉദ്യോഗസ്ഥരെ വിവരം അറിയിക്കുകയായിരുന്നു. തുടർന്ന് തിരുവല്ല ഫയർ സ്റ്റേഷനിലേക്കും വിവരം കൈമാറി. ഫയർ ഫോഴ്സ് സംഘം അതിവേഗം സ്ഥലത്തെത്തി ഫയർ എക്സ്റ്റിങ്വിഷർ ഉൾപ്പെടെയുള്ള സംവിധാനങ്ങൾ ഉപയോഗിച്ച് തീ അണക്കാൻ ശ്രമിച്ചെങ്കിലും ആദ്യഘട്ടത്തിൽ തീ നിയന്ത്രണവിധേയമാക്കാൻ കഴിഞ്ഞില്ല.
പിന്നീട് രണ്ട് യൂണിറ്റ് ഫയർ ഫോഴ്സ് സംഘങ്ങൾ കൂടി സ്ഥലത്തെത്തി നടത്തിയ സമയോചിതമായ ഇടപെടലിലൂടെ തീ പൂർണമായും അണയ്ക്കുകയായിരുന്നു. സമീപത്ത് നിരവധി വാഹനങ്ങൾ പാർക്ക് ചെയ്തിരുന്നതിനാൽ തീ പടർന്നിരുന്നെങ്കിൽ വലിയ അപകടത്തിന് ഇടയാക്കുമായിരുന്നുവെന്ന് നാട്ടുകാർ പറഞ്ഞു. ഫയർ ഫോഴ്സിന്റെ വേഗത്തിലുള്ള ഇടപെടലാണ് വലിയ ദുരന്തം ഒഴിവാക്കാൻ സഹായമായത്.
