കോട്ടയം : വണ്വേ തെറ്റിച്ചെത്തിയ കെ.എസ്.ആര്.ടി.സി മിന്നല് ബസിടിച്ച് ബൈക്ക് യാത്രക്കാരനായ യുവാവ് മരിച്ചു. വെള്ളിയാഴ്ച പുലര്ച്ചെ രണ്ടരയോടെ കോട്ടയം നഗരത്തില് കോഴിച്ചന്ത റോഡിലാണ് അപകടം ഉണ്ടായത് ചങ്ങനാശേരി മോര്ക്കുളങ്ങര പുതുപ്പറമ്പില് അഭിഷേക് (20)ആണ് മരിച്ചത്. ഒപ്പമുണ്ടായിരുന്ന കാരാപ്പുഴ സ്വദേശിയായ ആരോമലിനെ പരിക്കുകളോടെ കോട്ടയം മെഡിക്കല് കോളേജ് ആശുപത്രിയില് പ്രവേശിപ്പിച്ചു.
കോട്ടയം സ്റ്റാന്ഡില് എത്തിയ കെ.എസ്.ആര്.ടി.സിയുടെ മിന്നല് ബസ് വണ്വേ തെറ്റിച്ച് കോഴിച്ചന്ത ഭാഗത്ത് കൂടി തിരികെ പോകുകയായിരുന്നു. ഈ സമയം എതിര് ദിശയിലൂടെ എത്തിയ അഭിഷേകിന്റെ ബൈക്കും ബസും തമ്മില് കോഴിച്ചന്ത റോഡില് പുളിമൂട് ജംഗ്ഷന് ചേരുന്ന ഭാഗത്ത് വെച്ച് കൂട്ടിയിടിക്കുകയായിരുന്നു. ഇടിയുടെ ആഘാതത്തില് റോഡില് വീഴുകയായിരുന്നു. തുടര്ന്ന് ഇരുവരെയും നാട്ടുകാരും ഓട്ടോ ഡ്രൈവര്മാരും ചേര്ന്ന് ആശുപത്രിയില് എത്തിക്കുകയായിരുന്നു.
