യു.കെ : ചന്ദനപ്പള്ളി സ്വദേശിയായ യുവാവ് യുകെയിൽ കുഴഞ്ഞുവീണ് മരിച്ചു. ചന്ദനപ്പള്ളി കുറ്റിവടക്കേതിൽ (പുത്തൻകാവിൽ) കോശിയുടെയും ഹിൽഡാ കോശിയുടെയും മകന് ലെസ്ലി കെ. ജോൺ (39) ആണ് മരിച്ചത്. ലെസ്ലിയുടെ മൃതദേഹം നിലവിൽ ഹാരോയിലെ നോർത്ത്വിക് പാർക്ക് ആശുപത്രിയിൽ സൂക്ഷിച്ചിരിക്കുകയാണ്. യുകെയിലെ നിയമനടപടികൾ പൂർത്തിയായ ശേഷം മൃതദേഹം നാട്ടിലെത്തിച്ച് സംസ്കാരം നടത്തുമെന്ന് ബന്ധുക്കൾ അറിയിച്ചു. ചന്ദനപ്പള്ളി സെന്റ് ജോർജ് ഓർത്തഡോക്സ് വലിയപള്ളി ഇടവകാംഗമാണ്. ഭാര്യ സുനിഷ.
കഴിഞ്ഞ ദിവസം വൈകിട്ട് 5.30ഓടെയായിരുന്നു സംഭവം. ജോലിസ്ഥലത്ത് കുഴഞ്ഞുവീണ ലെസ്ലിയെ ഉടൻ ആശുപത്രിയിലെത്തിക്കാൻ ശ്രമിച്ചെങ്കിലും ജീവന് രക്ഷിക്കാനായില്ല. ഹൃദയാഘാതമാണ് മരണകാരണം എന്നാണ് പ്രാഥമിക നിഗമനം. യുകെയിലെ കെല്ലി കമ്മ്യൂണിക്കേഷൻസ് എന്ന സ്ഥാപനത്തിലെ പ്രൊക്യുർമെന്റ് വിഭാഗത്തിൽ ജീവനക്കാരനായിരുന്നു ലെസ്ലി. അഞ്ച് വർഷം മുമ്പാണ് ഭാര്യയോടൊപ്പം യുകെയിലേക്ക് കുടിയേറിയത്. വെംബ്ലിയിലായിരുന്നു താമസം.
