കോന്നി : കോന്നി മെഡിക്കൽ കോളേജിൽ അപകടത്തിൽ പരിക്കേറ്റ് എത്തിയ യുവാവിന് ചികിത്സ നിഷേധിച്ചതായി പരാതി. വാഴമുട്ടം സ്വദേശി അനന്തു ഭവനിൽ അനന്തു(21)വിനാണ് ചികിത്സ നിഷേധിച്ചത്. കഴിഞ്ഞ ദിവസം മുള്ളനിക്കാട് ഉണ്ടായ ബൈക്ക് അപകടത്തെ തുടർന്ന് അനന്തുവിനെ പത്തനംതിട്ട ജനറൽ ആശുപത്രിയിൽ പ്രവേശിപ്പിച്ചിരുന്നു. എന്നാൽ പത്തനംതിട്ട ജനറൽ ആശുപത്രിയിൽ അറ്റകുറ്റപ്പണികൾ നടക്കുന്നതിനാൽ അനന്തുവിനെ കോട്ടയം മെഡിക്കൽ കോളേജിലേക്ക് അയക്കുകയും അനന്തുവിന്റെ കാലിലെ ഒരു വിരൽ മുറിച്ചുമാറ്റുകയും ചെയ്തിരുന്നു.
പിന്നീട് അനന്തുവിനെ വീണ്ടും പത്തനംതിട്ട ജനറൽ ആശുപത്രിയിലേക്ക് വിടുകയും ഇവിടെ ചികിത്സ ലഭിക്കാതെ വന്നതോടെ കോന്നി മെഡിക്കൽ കോളേജിലേക്ക് വിടുകയുമായിരുന്നു. എന്നാൽ കോന്നി മെഡിക്കൽ കോളേജിൽ സൗകര്യങ്ങൾ ഇല്ലാത്തതിനാൽ ഇവിടെ നിന്ന് കൊണ്ടുപോകുണം എന്നായിരുന്നു കോന്നി മെഡിക്കൽ കോളേജ് അധികൃതർ പറഞ്ഞത് എന്നും അനന്തു പറഞ്ഞു. പിന്നീട് മാധ്യമങ്ങൾ ഇടപെട്ടതിനെ തുടർന്ന് അനന്തുവിനെ കോന്നി മെഡിക്കൽ കോളേജിൽ അഡ്മിറ്റ് ചെയ്യുകയായിരുന്നു.
