താമരശ്ശേരി : വിദ്യാര്ഥിനികളെ റോഡില്വെച്ച് കടന്നുപിടിച്ച ഇതര സംസ്ഥാന തൊഴിലാളി പിടിയില്. ഉത്തര്പ്രദേശിലെ മുറാദാബാദ് ജില്ലയിലെ അസ്മോളി ഓബ്രി സ്വദേശി സല്മാനെയാണ് (22) പോക്സോ വകുപ്പുകള് ചുമത്തി താമരശ്ശേരി പോലീസ് അറസ്റ്റു ചെയ്തത്. ഞായറാഴ്ച വൈകീട്ട് കൂട്ടുകാരിക്കൊപ്പം തച്ചംപൊയിലില്നിന്ന് ഈര്പ്പോണ ഭാഗത്തേക്ക് നടന്നുപോകുന്ന സമയത്താണ് ബൈക്കിലെത്തിയ യുവാവ് കടന്നുപിടിച്ചത്. വിദ്യാര്ഥിനികള് ബഹളംവെച്ചപ്പോള് രക്ഷപ്പെടാന് ശ്രമിച്ച പ്രതിയെ ഓടിക്കൂടിയ നാട്ടുകാര് പിന്തുടര്ന്ന് പി.സി മുക്കിനു സമീപംവെച്ചാണ് പിടികൂടിയത്. ഇയാള് സഞ്ചരിച്ച ബൈക്കും പോലീസ് കസ്റ്റഡിയിലെടുത്തു.
