തിരുവനന്തപുരം : കേരളം കോവിഡ് കണക്കുകള് നല്കുന്നില്ലെന്നത് തെറ്റായ പ്രചാരണമാണെന്ന് മന്ത്രി വീണാ ജോര്ജ്. വസ്തുതാ വിരുദ്ധമായ ആരോപണങ്ങളാണ് നടക്കുന്നതെന്ന് മന്ത്രി മാധ്യമങ്ങളോട് പറഞ്ഞു. നാഷണല് സര്വൈലന്സ് യൂണിറ്റിന് കണക്ക് കൊടുക്കുന്നുണ്ട്. എല്ലാദിവസവും മെയില് അയക്കുന്നുണ്ടെന്നും കേന്ദ്രം തെറ്റായ കാര്യം പ്രചരിപ്പിക്കുന്നത് എന്തിനാണെന്നും ആരോഗ്യമന്ത്രി ചോദിച്ചു. ആഴ്ചയിലൊരിക്കല് പൊതുജനങ്ങള് അറിയാന് കോവിഡ് റിപ്പോര്ട്ട് ഉണ്ടാകും. രോഗബാധ കൂടിയാല് ദിവസവും ബുള്ളറ്റിന് ഉണ്ടാകുമെന്നും മന്ത്രി പറഞ്ഞു. കോവിഡ് കണക്കുകള് കൃത്യമായി പുറത്ത് വിടണമെന്നാവശ്യപ്പെട്ട് ആരോഗ്യ സെക്രട്ടറിക്ക് കേന്ദ്രം കത്തയച്ചിരുന്നു.
കോവിഡ് കുറഞ്ഞപ്പോള് കണക്ക് പ്രസിദ്ധീകരിക്കേണ്ടെന്ന് സര്ക്കാര് എടുത്ത തീരുമാനമാണ്. കൃത്യമായി ജില്ലാ സംസ്ഥാന തല അവലോകനമുള്പ്പടെ നടക്കുന്നുണ്ട്. അതാത് ദിവസങ്ങളിലെ ഡേറ്റകള് ആണ് അയച്ചിട്ടുള്ളത്. കേരളം ഒന്നും ചെയ്തിട്ടില്ലെന്ന് ബോധപൂര്വം വരുത്തി തീര്ക്കാന് ശ്രമമുണ്ടെന്നും കേന്ദ്ര നിലപാട് അത്യന്തം പ്രതിഷേധാര്ഹമാണെന്നും ആരോഗ്യ മന്ത്രി പറഞ്ഞു.
കോവിഡ് കണക്കുകള് കൂടുകയാണെങ്കില് വീണ്ടും ബുള്ളറ്റിനുകള് ഇറക്കുമെന്നും മന്ത്രി വീണാ ജോര്ജ് വ്യക്തമാക്കി. അഞ്ച് ദിവസത്തിന് ശേഷം കേരളം ഒറ്റയടിക്ക് കോവിഡ് കണക്കുകള് പുറത്ത് വിട്ടതാണ് രാജ്യത്തെയാകെ കോവിഡ് കണക്ക് ഉയരാനിടയാക്കിയതെന്ന് ചൂണ്ടികാണിച്ച് ആരോഗ്യ മന്ത്രാലയം കേരളത്തിന് കത്തയച്ചിരുന്നു.