സരൺ: ബിഹാറിൽ അമിത വേഗതയിലെത്തിയ കാർ ഇടിച്ച് 18 പേർക്ക് ഗുരുതരമായി പരിക്ക്. ബിഹാറിലെ സരൺ ജില്ലയിൽ ശനിയാഴ്ച രാത്രിയാണ് സംഭവം. ശവസംസ്കാര ചടങ്ങിൽ പങ്കെടുക്കാനെത്തിയവർക്കാണ് പരിക്കേറ്റത്. ഭക്ഷണം കഴിക്കുന്നതിനിടെ അതിവേഗത്തിലെത്തിയ കാർ ജനക്കൂട്ടത്തിനിടയിലൂടെ പാഞ്ഞുകയറുകയായിരുന്നു. പരിക്കേറ്റവരെ ഉടൻ തന്നെ അടുത്തുള്ള ആശുപത്രിയിൽ എത്തിച്ചു.
സംഭവത്തെ തുടർന്ന് രോഷാകുലരായ നാട്ടുകാർ പ്രധാന റോഡ് ഉപരോധിച്ചു. ഡ്രൈവർ മദ്യലഹരിയിലായിരുന്നുവെന്നാണ് ഗ്രാമവാസികൾ പറയുന്നത്.ഏതാനും ദിവസങ്ങൾക്ക് മുമ്പ് ബീഹാറിലെ വൈശാലി ജില്ലയിൽ അമിതവേഗതയിൽ വന്ന ട്രക്ക് ജനക്കൂട്ടത്തിലേക്ക് ഇടിച്ചുകയറി നിരവധി കുട്ടികളടക്കം എട്ട് പേർ മരിച്ചിരുന്നു. വൈശാലി ജില്ലയിലെ മെഹ്നാർ ഗ്രാമത്തിലാണ് അപകടമുണ്ടായത്.
