തിരുവനന്തപുരം : മന്ത്രി കെ.രാധാകൃഷ്ണനെതിരെ വധഭീഷണി മുഴക്കിയയാള് പിടിയില്. തിരുവനന്തപുരം കാച്ചാണി സ്വദേശി അഭിജിത്തിനെയാണ് കന്റോണ്മെന്റ് പോലീസ് അറസ്റ്റ് ചെയ്തത്. മന്ത്രിയുടെ ഓഫിസിലെ ലാന്ഡ് ഫോണില് വിളിച്ചാണ് അഭിജിത്ത് ഭീഷണിപ്പെടുത്തിയത്.
പട്ടികജാതി വകുപ്പിലെ അഴിമതി അന്വേഷിക്കാന് നടപടിയെടുത്തതോടെ തനിക്ക് വധഭീഷണിയുണ്ടായെന്ന് ആരോപിച്ച് മന്ത്രി കെ.രാധാകൃഷ്ണന് ഇന്നലെ പോലീസില് പരാതി നല്കിയിരുന്നു. ഇതിന് പിന്നാലെയാണ് പ്രതിയെ പിടികൂടിയത്.
പട്ടികജാതി വികസന വകുപ്പിലെ ജീവനക്കാര് പാവങ്ങള്ക്ക് പ്രയോജനം ചെയ്യുന്ന രീതിയില് പ്രവര്ത്തിക്കണമെന്നും തെറ്റായ രീതിയില് പ്രവര്ത്തിക്കുന്ന ഉദ്യോഗസ്ഥരെ സംരക്ഷിക്കില്ലെന്നും കെ. രാധാകൃഷ്ണന് ഇന്നലെ പറഞ്ഞിരുന്നു. ഇതിനു പിന്നാലെയാണ് ഓഫീസിലേക്ക് ഭീഷണി സന്ദേശമെത്തിയത്. എസ്.സി-എസ്.ടി വകുപ്പിലെ ഫണ്ടുകള് തട്ടിയെടുത്തവര്ക്കെതിരെ കര്ശന നടപടി ഉണ്ടാകുമെന്നും മന്ത്രി വ്യക്തമാക്കി.
