കാസര്കോട്: കാസർകോട് കുമ്പള ആരിക്കാടിയിൽ ടോൾ പിരിവിനെതിരെ ആക്ഷൻ കമ്മറ്റി നടത്തുന്ന സമരം രണ്ടാം ഘട്ടത്തിലേക്ക്. തിങ്കളാഴ്ച കലക്ട്രേറ്റിൽ ജനപ്രതിനിധികളുടെ പ്രതിഷേധ സംഗമം നടത്തും. കാസർകോട് മഞ്ചേശ്വരം ബ്ലോക്കിന് കീഴിലെ ജനപ്രതിനിധികളും നഗരസഭ അംഗങ്ങളും സംഗമത്തിൽ പങ്കെടുക്കും. കഴിഞ്ഞ തിങ്കളാഴ്ച മുതൽ കുമ്പള ആരിക്കാടി ടോൾ ഗേറ്റിൽ യൂസർ ഫീ ഈടാക്കാൻ ആരംഭിച്ചതോടെയാണ് പ്രതിഷേധം ശക്തമായത്.
ചൊവ്വാഴ്ച മുതൽ എ.കെ.എം അഷ്റഫ് എംഎൽഎയുടെ നേതൃത്വത്തിൽ ആക്ഷൻ കമ്മറ്റി നടത്തിയ സത്യാഗ്രഹ സമരത്തിന് പോലീസ് നോട്ടീസ് നൽകി നേതാക്കളെ അറസ്റ്റ് ചെയ്തു നീക്കിയിരുന്നു. സമരപ്പന്തലും പോലീസ് പൊളിച്ച് മാറ്റി. ഇതിനെ തുടർന്നാണ് ആക്ഷൻ കമ്മറ്റി യോഗം ചേർന്ന് രണ്ടാം ഘട്ട സമരത്തിന് രൂപം നൽകിയത്. കുമ്പളയിൽ അഷ്റഫിന്റെ നേതൃത്വത്തിലായിരുന്നു ആക്ഷൻ കമ്മറ്റി യോഗം.
