മുംബൈ: ലഹരി മരുന്ന് കേസില്‍ അറസ്റ്റിലായ ബോളിവുഡ് നടി ക്രിസന്‍ പെരേര ജയില്‍ മോചിതയായി. മന:പൂര്‍വം നടിയെ കേസില്‍ കുടുക്കിയതാണ് എന്ന് വ്യക്തമായതിനെ തുടര്‍ന്നാണ് മോചിപ്പിക്കാന്‍ തീരുമാനമായത്. ഇപ്പോഴിതാ ജയിലിലെ ദുരവസ്ഥ വിവരിച്ച് എത്തിയിരിക്കുകയാണ് താരം. ജയിലില്‍ അലക്ക് സോപ്പ് ഉപയോഗിച്ച് മുടി കഴുകുകയും ടോയ്‌ലറ്റ് വെള്ളത്തില്‍ കാപ്പി ഉണ്ടാക്കുകയും ചെയ്തുവെന്ന് 27-കാരിയായ ക്രിസന്‍ പറയുന്നു. ഒരു കത്തിലൂടെയാണ് താന്‍ അനുഭവിച്ച ദുരവസ്ഥ വിവരിക്കുന്നത്.
പ്രിയപ്പെട്ടവരെ, ജയിലില്‍ പേനയും പേപ്പറും കണ്ടെത്താന്‍ എനിക്ക് മൂന്നാഴ്ചയും അഞ്ച് ദിവസവും വേണ്ടി വന്നു. ടൈഡ് ഉപയോഗിച്ച് മുടി കഴുകിയ ശേഷം, ടോയ്‌ലറ്റ് വെള്ളം ഉപയോഗിച്ച് കാപ്പി ഉണ്ടാക്കിയ ശേഷം, ഞാന്‍ ബോളിവുഡ് സിനിമകള്‍ കണ്ടു. തന്റെ നിരപരാധിത്വത്തില്‍ വിശ്വസിച്ച എല്ലാവര്‍ക്കും നന്ദിയുണ്ടെന്നും താരം പറഞ്ഞു. എന്റെ ജീവനും ഈ തട്ടിപ്പിന് ഇരയായ മറ്റ് നിരപരാധികളുടെ ജീവനും രക്ഷിച്ചതിന് നന്ദി. നീതി എപ്പോഴും വിജയിക്കട്ടെ – എന്നും താരം കുറിച്ചു.
