തിരുവനന്തപുരം: തലസ്ഥാനത്തെ ശ്രീവരാഹം കുളത്തിൽ ചാടി ജീവനൊടുക്കാൻ ശ്രമിച്ച മധ്യവയസ്കനെ രക്ഷപെടുത്തി ഫയർഫോഴ്സ് സംഘം. ആദ്യം കുളത്തിന്റെ നടുവിലുള്ള കൽമണ്ഡപത്തിൽ കയറി ആത്മഹത്യാ ഭീഷണി മുഴക്കിയ മധ്യവയസ്കൻ പിന്നീട് കുളത്തിലേക്ക് ചാടുകയായിരുന്നു. ആലപ്പുഴ സ്വദേശിയായ വിമൽരാജ് (53) ആണ് ജീവനൊടുക്കാൻ ശ്രമിച്ചത്. ഇന്നലെ രാവിലെ പത്ത് മണിയോടെയായിരുന്നു സംഭവം. കുളത്തിലേക്ക് ചാടിയ ഇയാൾ മധ്യത്തിലായി സ്ഥാപിച്ചിരുന്ന മണ്ഡപത്തിലൂടെ നടക്കുന്നതും വീണ്ടും ചാടുന്നതിന് ശ്രമിക്കുന്നതും ശ്രദ്ധയിൽപെട്ടത്തിന് പിന്നാലെ നാട്ടുകാർ അഗ്നിരക്ഷാ സേനയെ വിവരമറിയിക്കുകയായിരുന്നു.
വിവരമറിഞ്ഞതിന് തൊട്ടുപിന്നാലെ തിരുവനന്തപുരം യൂണിറ്റിൽ നിന്നും പാഞ്ഞെത്തിയ എസ്.ടി.ഒ. ഷാജിയുടെ നേതൃത്വത്തിലുള്ള ഫയർഫോഴ്സ് സംഘം ലൈഫ് ജാക്കറ്റും ബോയിയുമായി കുളത്തിലേക്ക് എടുത്തുചാടിക്കയും നീന്തിച്ചെന്ന് ഇയാളെ കരയ്ക്കെത്തിക്കുകയുമായിരുന്നു. കൂടുതൽ അക്കാര്യങ്ങളൊന്നും സംസാരിക്കാൻ തയ്യാറാകാതിരുന്ന ഇയാൾക്ക് മറ്റ് പരുക്കുകളൊന്നുമില്ലാതിരുന്നതിനാൽ പോലീസ് കസ്റ്റഡിയിൽ വിട്ടതായി ഫയർഫോഴ്സ് ഉദ്യോഗസ്ഥർ പറഞ്ഞു.
