ന്യൂഡല്ഹി : ആധാര് ലംഘനങ്ങള്ക്ക് ഒരു കോടി പിഴ നടപടികള്ക്ക് യുണീക്ക് ഐഡന്റിഫിക്കേഷന് അതോറിറ്റിക്ക് അധികാരം. ആധാര് നിയമലംഘനങ്ങളില് നടപടിയെടുക്കാന് യുണീക്ക് ഐഡന്റിഫിക്കേഷന് അതോറിറ്റിക്ക് അധികാരം നല്കുന്ന ചട്ടം വിജ്ഞാപനം ചെയ്തു. ലംഘനങ്ങള്ക്ക് ഒരു കോടി രൂപവരെ പിഴ ഈടാക്കാം.
ലംഘനങ്ങളില് നടപടിയെടുക്കാനും പരാതി പരിഹാരത്തിനും കേന്ദ്രസര്ക്കാരിലെ ജോയിന്റ് സെക്രട്ടറി തസ്തികയിലുള്ള ഉദ്യോഗസ്ഥനെ നിയമിക്കും. പരാതി പരിഹാര ഉദ്യോഗസ്ഥന് പത്ത് വര്ഷത്തെയെങ്കിലും സര്വീസ് വേണം. നിയമം, മാനേജ്മെന്റ്, എടി, വാണിജ്യം എന്നീ വിഷയങ്ങളിലൊന്നിലെങ്കിലും മൂന്നു വര്ഷത്തെ വിദഗ്ധ പരിചയമുണ്ടായിരിക്കണം. പിഴ അടയ്ക്കാത്തവരുടെ സ്വത്ത് കണ്ടുകെട്ടാനും നിര്ദേശിക്കാം.
നടപടിക്ക് മുന്പ് കാരണം കാണിക്കല് നോട്ടിസ് നല്കുകയും ആരോപണവിധേയര്ക്ക് വിശദീകരണം നല്കാന് അവസരം നല്കുകയും വേണം. ആധാര് വിവരങ്ങള് ഹാക്ക് ചെയ്യുന്നതും മറ്റൊരാളുടെ ബയോമെട്രിക് വിവരങ്ങള് നല്കുന്നതും കുറ്റകരമാണ്. 2019 ല് പാര്ലമെന്റ് പാസാക്കിയ ആധാര് നിയമത്തിന് അനുസൃതമായാണ് ചട്ടങ്ങള് .
