തിരുവനന്തപുരം : സാമ്പത്തിക പ്രതിസന്ധി രൂക്ഷമെന്ന് പറഞ്ഞ് കൂടുതല് നികുതി ജനങ്ങളുടെമേല് അടിച്ചേല്പ്പിച്ച സര്ക്കാര് എല് ഇ ഡി പരസ്യ ബോര്ഡുകള് സ്ഥാപിക്കാന് കോടികള് മുടക്കുന്നു . സര്ക്കാരിന്റെ ക്ഷേമ പ്രവര്ത്തനങ്ങള് വിശദീകരിക്കുന്ന ബോര്ഡുകള് സ്ഥാപിക്കാന് അഞ്ചുകോടി അനുവദിച്ചു. അഞ്ചു ജില്ലകളില് ബോര്ഡുകള് സ്ഥാപിക്കാന് മാത്രമാണ് അഞ്ചുകോടി ചെലവിടുന്നത് .
ഖജനാവില് പണമില്ലാത്തതിന്റെ ഭാരം മുഴുവന് ജനങ്ങളുടെ തലയില് കെട്ടിവെച്ച സര്ക്കാരിനു തദ്ദേശ തെരഞ്ഞെടുപ്പിനു സ്വന്തം നേട്ടങ്ങള് പരസ്യം ചെയ്യാനായി കോടികള് പൊടിക്കാന് മടിയില്ല. ആദ്യപടിയായി തിരുവനന്തപുരം , തൃശൂര്, മലപ്പുറം, കോഴിക്കോട്, കണ്ണൂര് എന്നീ അഞ്ച് ജില്ലകളിലാണ് അഞ്ചുകോടി ഇരുപത്തിമൂന്നു ലക്ഷത്തി എഴുപത്തിനാലായിരത്തി ഇരുനൂറ്റി എണ്പത്തി ഒന്നു രൂപ ചെലവിട്ട് പരസ്യം സ്ഥാപിക്കുന്നത്.
10 ലക്ഷത്തിനു മുകളില് നില വരുന്ന എല്.ഇ.ഡി സ്ക്രീന് അടങ്ങുന്ന 55 ഹോര്ഡിങ്സുകള് സ്ഥാപിക്കുന്നതിനാണ് ഇത്രയും തുക. സര്ക്കാര് സ്ഥാപനങ്ങള്, സര്ക്കാര് ഉടമസ്ഥതയിലുള്ള സ്ഥലങ്ങള് എന്നിവിടങ്ങളിലാണ് ബോര്ഡുകള് സ്ഥാപിക്കുക. ഇതിനായി പി.ആര്.ഡിയ്ക്ക് നിര്ദേശം നല്കി ഇതനുസരിച്ച് പരസ്യബോര്ഡുകള് സ്ഥാപിക്കാന് ഉദ്ദേശിക്കുന്ന സ്ഥലത്തിന്റെ ഉടമസ്ഥാവകാശമുള്ള സ്ഥാപന മേധാവികള്ക്ക് കത്തു നല്കി കഴിഞ്ഞു. തദ്ദേശ സ്വയംഭരണ തെരഞ്ഞെടുപ്പിനു മുമ്പ് ഹോര്ഡിങ്ങുകള് സ്ഥാപിക്കണമെന്നാണ് സര്ക്കാര് നിര്ദേശം.
