കൊൽക്കത്ത : ജോലി ലഭിക്കാത്ത വിഷമത്തിൽ എയർ ഹോസ്റ്റസ് ആത്മഹത്യ ചെയ്തു. കൊൽക്കത്തയിലാണ് സംഭവം. 27കാരിയായ ദേബോപ്രിയ ബിശ്വാസാണ് നാലാം നിലയിൽ നിന്നും ചാടി ജീവനൊടുക്കിയത്. കൊൽക്കത്തയിലെ പ്രഗതി മൈതാൻ പോലീസ് സ്റ്റേഷൻ പരിധിയിലെ മെട്രോപൊളിറ്റൻ കോ-ഓപ്പറേറ്റീവ് ഹൗസിംഗ് സൊസൈറ്റിയിലെ സഹോദരിയുടെ ഫ്ലാറ്റിലാണ് ഇവർ താമസിച്ചിരുന്നത്. ശനിയാഴ്ച വൈകിട്ട് നാലോടെയാണ് ദേബോപ്രിയ താഴേക്ക് ചാടിയത്.
കെട്ടിടത്തിന് മുന്നിലെ റോഡിലേക്കാണ് ദേബോപ്രിയ വീണത്. ഗുരുതരമായി പരിക്കേറ്റ യുവതിയെ ഉടൻ മെഡിക്കൽ കോളേജ് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. രണ്ട് വർഷമായി ജോലി ഇല്ലാത്ത വിഷമത്തിലായിരുന്നു യുവതിയെന്ന് പോലീസ് പറഞ്ഞു. ഏറെ നാളായി യുവതി വിഷാദവും മാനസിക പ്രശ്നങ്ങളും അനുഭവിച്ചിരുന്നുവെന്ന് കുടുംബാംഗങ്ങൾ പോലീസിനോട് വെളിപ്പെടുത്തി.
