അജ്മാൻ: ഒന്നാമത് അജ്മാൻ ഫോക്ലോർ ഫെസ്റ്റിവൽ ഏപ്രിൽ 19 മുതൽ 21 വരെ നടക്കുമെന്ന് അധികൃതർ പറഞ്ഞു. അജ്മാൻ കിരീടാവകാശിയും എക്സിക്യുട്ടീവ് കൗൺസിൽ ചെയർമാനുമായ ശൈഖ് അമ്മാർ ബിൻ ഹുമൈദ് അൽ നുഐമിയുടെ രക്ഷാകർതൃത്വത്തിലാണ് മൂന്ന് ദിവസത്തെ പരിപാടി. നാടോടിക്കഥകൾ, പൈതൃകം, സംസ്കാരം എന്നിവയെക്കുറിച്ച് പൊതുജനങ്ങളിൽ അവബോധം വർധിപ്പിക്കുകയാണ് ‘അജ്മാൻ. ചരിത്രത്തെയും ഐക്യത്തെയും സ്വീകരിക്കുന്നു’ എന്ന പ്രമേയത്തിലുള്ള പരിപാടിയുടെ ഉദ്ദേശ്യം. സാംസ്കാരിക മന്ത്രാലയം, അജ്മാൻ വിനോദസഞ്ചാര വികസന വകുപ്പ്, റെവാഖ് ഔഷ ബിൻത് ഹുസ്സൈൻ കൾച്ചറൽ സെന്റർ, എം.ടി.ജി. ഇവന്റസ് ഓർഗനൈസിങ് കമ്പനി എന്നിവർ സംയുക്തമായാണ് പരിപാടി സംഘടിപ്പിക്കുന്നത്. ഇമിറാത്തി പൈതൃകം സംരക്ഷിക്കുന്നതിലും അവ വരുംതലമുറകൾക്ക് കൈമാറുന്നതിലും ഇത്തരം ഉത്സവങ്ങൾക്ക് വലിയ പങ്കുണ്ട്. എമിറേറ്റിന്റെ സമ്പന്നമായ പൈതൃക പ്രദർശനത്തിലൂടെ വിനോദസഞ്ചാര, സാംസ്കാരിക ആകർഷണങ്ങൾ ഉയർത്തിക്കാട്ടാനാണ് പരിപാടിയിലൂടെ ഇവർ ലക്ഷ്യമിടുന്നത്.
