തിരുവനന്തപുരം : സമ്മതമില്ലാതെ തന്റെ പേരും ചിത്രവും ഉപയോഗിച്ച് ലോൺ ആപ്പ് പരസ്യം ചെയ്യുന്നതായി നടൻ അജു വർഗീസ്. എഎം ട്രസ്റ്റ് ലോൺ സർവീസസ് എന്ന ആപ്പിനെതിരെയാണ് നടൻ രംഗത്തെത്തിയത്. ഫേസ്ബുക്ക് പോസ്റ്റിലൂടെയായിരുന്നു ലോൺ ആപ്പിനെതിരെ അജു വർഗീസ് മുന്നറിയിപ്പ് നൽകിയത്. എഎം ട്രസ്റ്റ് ലോൺ സർവീസസ് നൽകിയിരിക്കുന്ന പരസ്യം പങ്കുവെച്ചുകൊണ്ട് ഈ പദ്ധതിയുമായി തനിക്ക് യാതൊരു ബന്ധവുമില്ലെന്നും ഇത്തരം വ്യാജ വാർത്തകളിൽ വീഴരുതെന്നും നടൻ വ്യക്തമാക്കി. ഈസി പേഴ്സണൽ ലോൺ എന്ന പേരിൽ കേരളത്തിൽ എവിടെയും മൂന്ന് ലക്ഷം രൂപ വരെ ലോൺ നൽകാമെന്ന് പറഞ്ഞാണ് പരസ്യം.
പരസ്യത്തിൽ അജു വർഗീസിന്റെ ചിത്രവും ഉപയോഗിച്ചിട്ടുണ്ട്. ഇത്തരത്തിൽ പല അഭിനേതാക്കളുടെ ചിത്രം ഉപയോഗിച്ച് പരസ്യങ്ങൾ പ്രചരിക്കുന്നുണ്ട്. ‘തന്റെ അനുവാദമില്ലാതെ ഒരു അനധികൃത സ്ഥാപനം തന്റെ പേരും ചിത്രവും പ്രചാരണത്തിന് ഉപയോഗിക്കുന്നതായി ശ്രദ്ധയിൽപ്പെട്ടിട്ടുണ്ട്. ദയവായി ഈ വ്യാജ പരസ്യത്തിൽ വീഴരുതെന്നും കഷ്ടപ്പെട്ട് ഉണ്ടാക്കിയ പണം അപകടത്തിലാക്കരുതെന്നും’ നടൻ സോഷ്യൽ മീഡിയയിൽ കുറിച്ചു.
