ആലപ്പുഴ: ആലപ്പുഴയിൽ ഗൃഹനാഥന്റെ കണ്ണിൽ മുളകുപൊടി എറിഞ്ഞ് 15 പവൻ സ്വർണം കവർന്നതായി പരാതി. ആലപ്പുഴ കൈതവന അപർണയിൽ സുദർശനന്റെ വീട്ടിലാണ് സംഭവം നടന്നത്. സുദർശനനും ഭാര്യയും മാത്രമായിരുന്നു വീട്ടിലുണ്ടായിരുന്നത്. ഈ സമയം വീട്ടിലെത്തിയ മോഷ്ടാക്കൾ ഗൃഹനാഥന്റെ കണ്ണിൽ മുളകുപൊടി എറിഞ്ഞ് ഇരുവരെയും ആക്രമിച്ച് കവർച്ച നടത്തുകയായിരുന്നു. ദമ്പതികളെ മർദിക്കുകയും വീട്ടിനുള്ളിൽ പൂട്ടിയിടുകയും വായിൽ തുണി തിരുകിക്കയറ്റുകയും ചെയ്തു. ഇതിന് ശേഷമാണ് അലമാരയിൽ സൂക്ഷിച്ചിരുന്ന 15 പവൻ സ്വർണം കവർന്ന് പ്രതികൾ കടന്നുകളഞ്ഞത്. സംഭവത്തിന് ശേഷം ദമ്പതികൾ സമീപവാസികളുടെ സഹായം തേടിയതോടെയാണ് വിവരം പുറത്തറിയുന്നത്.
പോലീസ് സ്ഥലത്തെത്തി പരിശോധന നടത്തി ഫൊറൻസിക് സംഘത്തിന്റെ സഹായത്തോടെ തെളിവുകൾ ശേഖരിച്ചു. സമീപ പ്രദേശങ്ങളിലെ സിസിടിവി ദൃശ്യങ്ങളും മറ്റ് ശാസ്ത്രീയ തെളിവുകളും കേന്ദ്രീകരിച്ച് അന്വേഷണം ഊർജിതമാക്കിയതായി പോലീസ് അറിയിച്ചു. സംഭവത്തിൽ അന്വേഷണം ആരംഭിച്ചിട്ടുണ്ട്.
