ന്യൂഡല്ഹി: പൂര്ണ സര്വീസിന് സജ്ജമാവാന് റെയില്വേ മന്ത്രാലയം ഡിവിഷന് ഓഫീസുകള്ക്ക് നിര്ദേശം നല്കി. എല്ലാ ട്രെയിനുകളും എപ്രില് ഒന്നു മുതല് രാജ്യത്ത് സര്വീസ് പുനരാരംഭിക്കുന്നതിന് മുന്നോടിയായാണ് നടപടി.
പ്രതിദിന ടൈംടെബിള് പ്രകാരമുള്ള സര്വീസ് റെയില്വേ നിര്ത്തിവച്ചിട്ട് ഒരു വര്ഷത്തിലേറെയായി. ഏപ്രില് ഒന്നു മുതല് പതിവു രീതിയിലേക്ക് സര്വീസുകള് പുനഃസ്ഥാപിക്കാനാണ് റെയില്വേയുടെ തിരുമാനം. സര്വീസുകള് ഉടന് സാധാരണ നിലയിലേക്ക് കൊണ്ടുവന്നില്ലെങ്കില് അത് സാമ്പത്തികമായും സാങ്കേതികമായും വലിയ നഷ്ടത്തിലേക്ക് നയിക്കുമെന്നാണ് റെയില്വേയുടെ വിലയിരുത്തല്.
രാജ്യത്ത് കോവിഡിന്റെ വ്യാപനം കുറഞ്ഞതും പൂര്ണ സര്വീസിന് സജ്ജമാവാന് റെയില്വേയെ പ്രേരിപ്പിക്കുന്നു. സര്വീസുകള് പൂര്ണ തോതില് ആരംഭിക്കുന്നതിന് ആഭ്യന്തരമന്ത്രാലയത്തിന് അന്തിമാനുമതിക്കായുള്ള അപേക്ഷയും റെയില്വേ സമര്പ്പിച്ചു. 65 ശതമാനം ട്രെയിനുകള് ആണ് ഇപ്പോള് സ്പെഷ്യല് സര്വീസ് നടത്തുന്നത്.