പത്തനംതിട്ട : ഡിസ്ട്രിക് മോട്ടോര് ഡ്രൈവിങ് സ്കൂള് ഓണേഴ്സ് ആന്ഡ് വര്ക്കേഴ്സ് സോഷ്യല് വെല്ഫയര് കോ-ഓപ്പറേറ്റീവ് സൊസൈറ്റിയില് സാമ്പത്തിക ക്രമക്കേട് നടന്നുവെന്ന ചില അംഗങ്ങളുടെ ആരോപണം അടിസ്ഥാന രഹിതമാണെന്ന് ഭരണസമിതി അംഗങ്ങള്. സംഘത്തില് നിന്നും വായ്പ എടുത്ത് തിരിച്ചടയ്ക്കാത്ത ചിലരാണ് ആരോപണം ഉന്നയിക്കുന്നതെന്ന് അവര് പറഞ്ഞു. സംഘത്തെ ഇല്ലാതാക്കാനാണ് ഇവരുടെ ശ്രമം. ഓഡിറ്റ് റിപ്പോര്ട്ടുകളില് അഴിമതി നടന്നതായി പറയുന്നില്ല. സംഘത്തിന്റെ പേരിലുള്ള വാഹനങ്ങള് അംഗങ്ങളുടെ പേരില് തന്നെയാണ്. അവയൊന്നും പണയപ്പെടുത്തിയിട്ടില്ല. നിയമനത്തിന്റെ പേരില് ആരില് നിന്നും പണവും വാങ്ങിയിട്ടില്ല.
സംഘത്തിന്റെ അധീനതയിലുള്ള ഡ്രൈവിങ് സ്കൂള് ലൈസന്സോടു കൂടിയാണ് പ്രവര്ത്തിക്കുന്നത്. സ്കൂള് പൂട്ടിക്കാനും ശ്രമം നടന്നിരുന്നു. നിലവില് പോരായ്മകള് പരിഹരിച്ച ശേഷമാണ് ഡ്രൈവിങ് സ്കൂള് പ്രവര്ത്തിക്കുന്നത്. ചില അംഗങ്ങളുടെ പരാതികളെ തുടര്ന്ന് വകുപ്പ് തലത്തില് ജെ.ആറിന്റെ അന്വേഷണം നടക്കുന്നതായും ഭാരവാഹികള് പറഞ്ഞു. കൂടാതെ സി.ഐ.ടി.യു യൂണിയന് തലത്തിലുംഅന്വേഷണം നടക്കുന്നുണ്ടെന്ന് പ്രസിഡന്റ് ഷിജു ഏബ്രഹാം, വൈസ് പ്രസിഡന്റ് എം. നിഷാദ്, സെക്രട്ടറി മാത്യു ഏബ്രഹാം, ബോര്ഡ് അംഗങ്ങളായ പി.ആര്. സോമന്പിള്ള, അനില്കുമാര്, ആശാ റാണി എന്നിവര് പറഞ്ഞു.
