പത്തനംതിട്ട : മൈലപ്ര പ്രാഥമിക ആരോഗ്യകേന്ദ്രത്തിന്റെ പുതിയ ആശുപത്രി കെട്ടിടം ഉദ്ഘാടനത്തിന് ഒരുങ്ങുന്നതിനോടൊപ്പം ആരോപണങ്ങളും ഉയരുന്നു. ഉത്ഘാടന ചടങ്ങിന്റെ ചെലവ് ആരോഗ്യ കേന്ദ്രത്തിലെ ജീവനക്കാര് വഹിക്കണമെന്ന് ആവശ്യപ്പെട്ടെന്നാണ് വിവരം. പഞ്ചായത്തിന് ഉദ്ഘാടനം നടത്താൻ ആവശ്യമായ ഫണ്ട് നിലവിൽ ഇല്ലെന്നും ഉദ്ഘാടനച്ചടങ്ങിനായി വേദി ഒരുക്കൽ, അലങ്കാരം, മറ്റ് ക്രമീകരണങ്ങൾ എന്നിവയ്ക്ക് വേണ്ട ചെലവ് ജീവനക്കാർ ചേർന്ന് കണ്ടെത്തണമെന്നും പഞ്ചായത്തിന്റെ ഭാഗത്ത് നിന്ന് ആവശ്യപ്പെട്ടതായാണ് വിവരം.
സാധാരണയായി പ്രാഥമികാരോഗ്യ കേന്ദ്രങ്ങളുടെ പുതിയ കെട്ടിടങ്ങളുടെ ഉദ്ഘാടനച്ചടങ്ങ് ബന്ധപ്പെട്ട തദ്ദേശ സ്വയംഭരണ സ്ഥാപനമോ അല്ലെങ്കിൽ നിർമാണം നടത്തിയ വകുപ്പോ ആണ് സംഘടിപ്പിക്കുകയും ചെലവ് വഹിക്കുകയും ചെയ്യുന്നത്. ആരോഗ്യ കേന്ദ്രത്തിലെ ജീവനക്കാർക്ക് ഇത്തരം ചടങ്ങുകളുടെ ചെലവ് വഹിക്കേണ്ട ഒരു ബാധ്യതയും നിലവിലില്ല. ഈ വിഷയത്തിൽ വ്യക്തത വരുത്തണമെന്ന ആവശ്യവും ആരോഗ്യ മേഖലയിലെ വിവിധ സംഘടനകളുടെ ഭാഗത്ത് നിന്ന് ഉയർന്നിട്ടുണ്ട്.
