റാന്നി: ഉന്നത നിലവാരത്തില് നിര്മ്മിച്ച റോഡിലെ കുഴിയടക്കല് പ്രഹസനം ആയതായി ആരോപണം. മന്ദിരം-വടശേരിക്കര ശബരിമല പാതയിലെ കുഴിയടക്കലാണ് പ്രഹസനമായി മാറിയത്. ഉന്നത നിലവാരത്തില് നിര്മ്മിച്ച റോഡിന്റെ പരിചരണ കാലാവധി കഴിഞ്ഞിട്ടില്ല. കാലാവധി പൂര്ത്തിയാകാത്ത റോഡില് പലയിടത്തും കുഴികള് രൂപപെട്ടിരുന്നു. വശങ്ങള് ഐറിഷ് വര്ക്ക് ചെയ്യാത്തതുമൂലം പലയിടത്തും വശം ഇരുത്തിയിട്ടുമുണ്ട്. അമിതഭാരം കയറ്റിയ വാഹനങ്ങളുടെ സഞ്ചാരമാണ് റോഡ് തകരാന് കാരണം.
പഴയ റോഡിലെ ഐറിഷ് വര്ക്കാണ് നിലവില് ഉള്ളത്.ശബരിമല തീര്ത്ഥാടനം ആരംഭിച്ചതിന് മുന്നോടിയായിട്ടാണ് റോഡിലെ കുഴികള് അടച്ചത്. കുഴികള് വേണ്ടത്ര ഒരുക്കങ്ങള് ഇല്ലാതെ ആണ് അടച്ചത്. ടാര് കലര്ത്തിയ മിശ്രിതം കുഴികളുടെ മുകളില് ഇട്ടത് വാഹനങ്ങള് കയറിഇറങ്ങിയതോടെ ഇരുത്തിയ നിലയിലാണ്. കരാറുകാര് കുഴിയടക്കല് നടത്തിയത് പ്രഹസനം ആയതോടെ അപകട സാധ്യതയുമായി. കുഴി അടച്ചെന്ന ധാരണയില് എത്തുന്ന ഇരുചക്ര വാഹനയാത്രികര്ക്ക് ഇത് കെണിയാകാന് സാധ്യതയേറെയാണ്.
