ചണ്ഡിഗഡ് : വിവാദ കാര്‍ഷിക നിയമങ്ങള്‍ റദ്ദാക്കുന്നതുമായി ബന്ധപ്പെട്ട് നവംബര്‍ എട്ടിന് നിയമസഭയുടെ പ്രത്യേക സമ്മേളനം വിളിച്ച്‌ പഞ്ചാബ് മുഖ്യമന്ത്രി ചരണ്‍ജിത്ത് സിങ് ചന്നി. നവംബര്‍ എട്ടിന് മുന്‍പായി കാര്‍ഷിക ബില്ലുകള്‍ കേന്ദ്രം റദ്ദാക്കിയില്ലെങ്കില്‍ സംസ്ഥാനത്ത് ഈ നിയമങ്ങള്‍ നടപ്പാക്കുന്നത് തടയാന്‍ സമ്മേളനത്തില്‍ പ്രമേയം പാസാക്കുമെന്ന് മുഖ്യമന്ത്രി മാധ്യമങ്ങളോട് പറഞ്ഞു.
സംസ്ഥാനത്തെ അതിര്‍ത്തി രക്ഷാസേനയുടെ അധികാര പരിധി വര്‍ധിപ്പിക്കുന്നതുമായി ബന്ധപ്പെട്ട് കേന്ദ്രം പുറത്തിറക്കിയ വിജ്ഞാപനം പിന്‍വലിക്കണമെന്ന ആവശ്യവും പ്രത്യേക സമ്മേളനത്തില്‍ ഉന്നയിക്കും. 15 കിലോമീറ്ററില്‍ നിന്നും അധികാര പരിധി 50 കിലോമീറ്ററായി വര്‍ധിപ്പിക്കണമെന്നാണ് വിജ്ഞാപനത്തില്‍ പറയുന്നത്.
