പീരുമേട് : ശ്വാസതടസ്സം നേരിട്ട കുട്ടിയെ ആശുപത്രിയിലെത്തിച്ച നിര്വൃതിയിലാണ് പീരുമേട് സ്വദേശി രാഹിൽ രാജ്. പീരുമേട് താലൂക്ക് ആശുപത്രിയിലെ ആംബുലൻസ് ഡ്രൈവറാണ് രാഹിൽ. ഞായറാഴ്ച രാവിലെയാണ് ഏലപ്പാറ കോഴിക്കാനം സ്വദേശിയായ നവ്യ എന്ന ആറുവയസ്സുകാരിയെ ശ്വാസതടസ്സവുമായി താലൂക്ക് ആശുപത്രിയിലെത്തിച്ചത്.
പ്രാഥമിക ചികിത്സ നൽകിയശേഷം കുട്ടിയെ എത്രയുംവേഗം കോട്ടയം മെഡിക്കൽ കോളേജ് ആശുപത്രിയിലെത്തിക്കാനാണ് ഡോക്ടർമാർ നിർദേശിച്ചത്. പത്തോടെ ആംബുലൻസ് ആശുപത്രിയിൽനിന്ന് പുറപ്പെട്ടു. പോലീസ് കൺട്രോൾ റൂം, ട്രാഫിക് പോലീസ് ഡ്രൈവർമാരുടെ സംഘടനയായ എ.കെ.ഡി.എഫ്. എന്നിവരുടെ സംയുക്തമായ ഇടപെടലുകളും വഴിയിലുണ്ടായി.
പീരുമേട് താലൂക്ക് ആശുപത്രിയിൽനിന്ന് 88 കിലോമീറ്റർ അകലെയുള്ള മെഡിക്കൽ കോളേജിലേക്ക് ഒന്നേകാൽമണിക്കൂർ സമയത്തിൽ ജീവനോട് മല്ലടിച്ച കുട്ടിയെ എത്തിക്കാനായി. മെഡിക്കൽ കോളേജിൽ കുട്ടികളുടെ ആശുപത്രിയിൽ പ്രവേശിപ്പിച്ച കുട്ടി തീവ്രപരിചരണ വിഭാഗത്തിൽ ചികിത്സയിലാണ്.