പത്തനംതിട്ട: കൊവിഡ് രോഗിയായ യുവതിയെ ആംബുലന്‍സില്‍ പീഡിപ്പിച്ച കേസിലെ പ്രതി നൗഫലിന്റെ ജാമ്യാപേക്ഷ കോടതി തള്ളി. പത്തനംതിട്ട പ്രിന്‍സിപ്പല്‍ സെഷന്‍സ് കോടതിയാണ് ജാമ്യാപേക്ഷതള്ളിയത്.
പ്രതി യാതൊരു ദയയും അര്‍ഹിക്കുന്നില്ലെന്നും പ്രതിയുടെ പ്രവ‌ൃത്തി മൂലം യുവതിക്ക് കടുത്ത മാനസികാഘാതം ഏറ്റെന്നും കോടതി നിരീക്ഷിച്ചു. വിവാഹിതനായ പ്രതി കരുതിക്കുട്ടിയാണ് കൃത്യം നടത്തിയതെന്ന് പബ്ലിക് പ്രോസിക്യൂട്ടറുടെ വാദം.
ആറന്മുളയ്ക്ക് സമീപം ഇക്കഴിഞ്ഞ സെപ്തംബര്‍ അഞ്ചിനായിരുന്നു പീഡനം. ആടൂരില്‍ നിന്നും കോഴഞ്ചേരിയിലെ കൊവിഡ് കെയര്‍ സെന്ററിലേക്ക് യുവതിയുമായി പോകുന്നതിനിടെയാണ് സംഭവം. രണ്ടു യുവതികളാണ് ആംബുലന്‍സില്‍ ഉണ്ടായിരുന്നത്. ഒരാളെ ആരോഗ്യവകുപ്പ് അധികൃതരുടെ നിര്‍ദേശപ്രകാരം കോഴഞ്ചേരി ജില്ലാ ആശുപത്രിയില്‍ ഇറക്കി. പീഡനത്തിനിരയായ യുവതിയുമായി കൊവിഡ് ചികിത്സാ കേന്ദ്രത്തിലേക്ക് യാത്ര തുടരുന്നതിനിടെ ആറന്മുള വിമാനത്താവള പദ്ധതി പ്രദേശത്തെ ആളൊഴിഞ്ഞ സ്ഥലത്തുവെച്ച്‌ പീഡിപ്പിക്കുകയായിരുന്നു. വധശ്രമക്കേസിലെ പ്രതികൂടിയായ നൗഫലിനെ ഉടന്‍തന്നെ പോലീസ് അറസ്റ്റുചെയ്യുകയായിരുന്നു.
