ദില്ലി: വാരിസ് പഞ്ചാബ് ദേയുടെ തലവനായ ഖാലിസ്ഥാനി വിഘടനവാദി നേതാവ് അമൃത്പാല് സിങിനായി ആറാം ദിവസവും തെരച്ചില് തുടരുന്നു. അമൃത്പാല് സിങ് രക്ഷപ്പെട്ടത് അഞ്ച് വാഹനങ്ങളിലായെന്ന് പഞ്ചാബ് പോലീസ് പറഞ്ഞു. കാറുകളും ബൈക്കുകളും മുച്ചക്രവാഹനവും ഉപയോഗിച്ചാണ് ഇയാള് കടന്നത്. മഹാരാഷ്ട്ര പോലീസിനും ജാഗ്രത നിര്ദേശം നല്കിയിട്ടുണ്ട്. ജലന്ധറിലൂടെ അറുപത് കിലോമീറ്റര് അഞ്ച് വാഹനം മാറി മാറി ഉപയോഗിച്ചാണ് അമൃത്പാല് രക്ഷപ്പെട്ടതെന്നാണ് പോലീസ് പറയുന്നത്.
അമൃത്പാല് സിങിന്റെ നേതൃത്വത്തിലുള്ള സംഘത്തിലെ 154 പേരെ പോലീസ് അറസ്റ്റ് ചെയ്തിട്ടുണ്ട്. പഞ്ചാബിലെ പലയിടത്തും ശക്തമായ വാഹന പരിശോധന നടത്തി സുരക്ഷ ശക്തമാക്കിയിട്ടുണ്ട്. അമൃത്പാല് ഷാകോട്ടിലെ ചാക്ക് ബെഹ്മാനിയാന് ടോള് പ്ലാസയിലൂടെ ബ്രസ്സ വാഹനത്തില് സഞ്ചരിക്കുന്ന ദൃശ്യം നേരത്തെ പുറത്ത് വന്നിരുന്നു കാത്തു നഗ്ഗലില് വച്ച് ബ്രസ്സ കാര് ഉപേക്ഷിച്ച് അമൃത്പാല് സിങ് സഹായിയായ പപാല് പ്രീതിനൊപ്പം സഞ്ചാരം പ്ലാറ്റിന ബൈക്കിലാക്കിയെന്നും പോലീസ് കണ്ടെത്തിയിരുന്നു.
