ഡല്‍ഹി : മാരുതി സുസുക്കി മനേസര്‍ പ്ലാന്‍റിലെ ജീവനക്കാരന് കൊവിഡ് 19 സ്ഥിരീകരിച്ചു. ശനിയാഴ്ചയാണ് ഇയാള്‍ക്ക് രോഗബാധ സ്ഥിരീകരിച്ചത്. കമ്പനി അധികൃതരാണ് ഇക്കാര്യം അറിയിച്ചത്. രോഗബാധ സ്ഥിരീകരിച്ച ജീവനക്കാരനുമായി ബന്ധപ്പെട്ടവരോട് വീട്ടുനിരീക്ഷണത്തില്‍ തുടരാന്‍ ആവശ്യപ്പെട്ടിട്ടുണ്ട്. രോഗബാധ സ്ഥിരീകരിച്ചയാളുടെ ആരോഗ്യനില തൃപ്തികരമാണ്. മെയ് 15 നാണ് ഇയാള്‍ അവസാനമായി ജോലിക്കെത്തിയതെന്നും മാരുതി പ്രസ്താവനയില്‍ അറിയിച്ചു. കഴിഞ്ഞയാഴ്ചയാണ് മാരുതി മനേസര്‍ പ്ലാന്‍റിലെ ഉല്പാദനം പുനഃരാരംഭിച്ചത്. മാര്‍ച്ചില്‍ ലോക്ഡൗണ്‍ പ്രഖ്യാപിച്ചതിനെ തുടര്‍ന്നാണ് മാരുതി നിര്‍മ്മാണ ശാലയിലെ ഉല്പാദനം നിര്‍ത്തിവെച്ചത്. സ്വിഫ്റ്റ്, ഡിസയര്‍ തുടങ്ങിയ മോഡലുകളാണ് ഇവിടെ നിര്‍മ്മിക്കുന്നത്. ഡല്‍ഹിയില്‍ നിന്ന് 137 കി.മീറ്റര്‍ അകലെയാണ് മനേസര്‍ പ്ലാന്‍റ് സ്ഥിതി ചെയ്യുന്നത്.
