പത്തനംതിട്ട : ഭാരതീയ വേലൻ സർവീസ് സൊസൈറ്റിയുടെ 11-ാം വാർഷിക പ്രതിനിധിസമ്മേളനം വെണ്ണിക്കുളത്ത് ആസ്ഥാന മന്ദിരത്തിൽ നടന്നു. സംസ്ഥാന പ്രസിഡന്റ് കെ.കെ. ശശി ഉദ്ഘാടനം ചെയ്തു. അധ്യാപക തസ്തികകൾ ഉൾപ്പെടെ എല്ലാ താത്കാലിക നിയമനങ്ങളിലും സംവരണതത്വം കൃത്യമായി പാലിക്കപ്പെടണമെന്നും താത്കാലിക അധ്യാപക നിയമനങ്ങളിൽ ഹൈക്കോടതി ഉത്തരവ് 1:1 അനുപാതത്തിലെ സർക്കാർ ഉത്തരവിൽ കൃത്യത ഉറപ്പുവരുത്തണമെന്നും അദ്ദേഹം പറഞ്ഞു. ഇ-ഗ്രാന്റ് ഉൾപ്പെടെയുള്ള വിദ്യാഭ്യാസ സഹായ പദ്ധതികളിലെ തുക കാലോചിതമായി വർധിപ്പിച്ച് സമയബന്ധിതമായി നൽകണം, ജാതി സർട്ടിഫിക്കറ്റ് നൽകുമ്പോൾ വ്യാജസർട്ടിഫിക്കറ്റ് ഒഴിവാക്കുന്നതിന് സമുദായ സാക്ഷ്യപത്രംകൂടി പരിഗണിക്കപ്പെടണം തുടങ്ങിയവ യോഗത്തിൽ സർക്കാരിനോടാവശ്യപ്പെട്ടു.
ബിവിഎസ്എസ് സംസ്ഥാന വൈസ് പ്രസിഡന്റ് വി.കെ. സോമൻ അധ്യക്ഷത വഹിച്ചു. വി.കെ. ഉത്തമൻ മുഖ്യപ്രഭാഷണം നടത്തി. ഉന്നത വിജയം നേടിയ വിദ്യാർഥികളെയും വിവിധ മേഖലകളിൽ കഴിവ് തെളിയിച്ചവരെയും ഡോ. രഘു കെ. മെമന്റോ നൽകി അനുമോദിച്ചു. പി.എസ്. ഗോവിന്ദൻ, വി.ജി. ഗോപിനാഥൻ, സുനിൽ നെടുമ്പ്രം, പി.ജി. കമലാസനൻ, ഹരി വാസുദേവൻ, സത്യൻ അങ്ങാടിക്കൽ, സി.എസ്. സുജിത് കുമാർ, അനിൽ വി.പരിയാരം, ഗീത തുടങ്ങിയവർ പ്രസംഗിച്ചു.
