പത്തനംതിട്ട : പത്തനംതിട്ട നഗരം സൗന്ദര്യവല്ക്കരണത്തിന്റെ ഭാഗമായി സ്ഥാപിച്ചിരുന്ന ചെടികള് വ്യാപകമായി നശിപ്പിക്കപ്പെട്ടു. ഇന്നലെ രാത്രിയാണ് സംഭവം. തിരുവല്ല – കുമ്പഴ റോഡില് കാര്ഷിക വികസന ബാങ്ക് മുതല് മസ്ജിദ് ജംഗ്ഷന് വരെയുള്ള ഭാഗത്താണ് സാമൂഹ്യവിരുദ്ധരുടെ അഴിഞ്ഞാട്ടം നടന്നത്. ഇരുപതോളം ചെടികള് തറയില് എറിഞ്ഞ് നശിപ്പിച്ചിരിക്കുകയാണ്. പത്തനംതിട്ട നഗരസഭ ലക്ഷങ്ങള് ചെലവഴിച്ചാണ് നടപ്പാതയോട് ചേര്ന്നുള്ള ഡിവൈഡറുകളില് ഇരുമ്പു ബ്രാക്കറ്റുകള് സ്ഥാപിച്ച് അതില് ചെടിച്ചട്ടികള് വെച്ചത്. 400 ലധികം ചെടികള് പത്തനംതിട്ട, കുമ്പഴ എന്നിവിടങ്ങളില് വെച്ചിരുന്നു. രാവിലെയും വൈകിട്ടും ചെടികള്ക്ക് വെള്ളം ഒഴിക്കുവാന് നഗരസഭ 6 തൊഴിലാളികളെയും ചുമതലപ്പെടുത്തിയിട്ടുണ്ട്. നഗരസഭയുടെ മുന് ചെയര്മാന് അഡ്വ.സക്കിര് ഹുസൈന് ആയിരുന്നു നഗര സൗന്ദര്യവല്ക്കരണ ആശയത്തിനു പിന്നില്.
നഗരസഭയില് പുതിയ ഭരണസമിതി അധികാരമേറ്റെങ്കിലും കാര്യമായ പ്രവര്ത്തനത്തിലേക്ക് കടന്നിട്ടില്ല. നഗരത്തിന്റെ ഭംഗിയായ ഠൗണ് സ്കയര് പലരും ദുരുപയോഗം ചെയ്യുകയാണ്. ഏറെ താമസിക്കാതെ ഇവിടം പോസ്റ്ററുകളും കൊടിതോരണങ്ങളും കൊണ്ട് അലങ്കരിക്കപ്പെടും. ഠൗണ് സ്കയര് കൃത്യമായി പരിപാലിക്കുവാന് നഗരസഭ താല്പ്പര്യപ്പെടുന്നില്ല. പുതിയ ചെയര് പേഴ്സണ് സിന്ധു അനിലിന് കാര്യമായ പ്രവര്ത്തനപരിചയം ഇല്ലാത്തതും പോരായ്മയാണ്. നഗരം ഭംഗിയായി സൂക്ഷിക്കുന്നതില് പുതിയ ഭരണസമിതി കൂടുതല് ജാഗ്രത കാണിക്കണമെന്ന് മുന് ചെയര്മാന് അഡ്വ.സക്കിര് ഹുസൈന് ആവശ്യപ്പെട്ടു.
