കൊച്ചി: പുരാവസ്തു തട്ടിപ്പ് കേസില് മോന്സന് മാവുങ്കലിന് നല്കിയ പണത്തിന്റെ ഉറവിടം പരാതിക്കാര് വെള്ളിയാഴ്ച ക്രൈംബ്രാഞ്ചിന് കൈമാറും. മോന്സന് നല്കിയ 10 കോടി രൂപയില് 2.10 കോടി ഒഴികെയുള്ളത് ഹവാല പണമാണെന്ന് ക്രൈംബ്രാഞ്ച് അന്വേഷണ ഉദ്യോഗസ്ഥന് വെളിപ്പെടുത്തിയിരുന്നു. ബാക്കി പണം നല്കിയതിന്റെ ഉറവിടമാണ് ക്രൈംബ്രാഞ്ച് തേടിയത്. വെള്ളിയാഴ്ച രേഖകള് ഹാജരാക്കാനാണ് നിര്ദേശിച്ചത്. പണത്തിന്റെ ഉറവിടം വ്യക്തമാക്കുമെന്ന് പരാതിക്കാരില് ഒരാളായ കോഴിക്കോട് സ്വദേശി ഷമീര് വ്യക്തമാക്കി. ക്രൈംബ്രാഞ്ച് നടപടിയെ പരാതിക്കാര് ചോദ്യം ചെയ്യുന്നുണ്ട്. കേസന്വേഷണം അവസാനിച്ചതായി ക്രൈംബ്രാഞ്ച് കോടതിയെ അറിയിച്ച ശേഷം പണത്തിന്റെ ഉറവിടം ചോദിക്കുന്നത് ദുരൂഹമാണെന്നാണ് ഇവരുടെ ആക്ഷേപം.
ബാങ്ക് വഴിയും നേരിട്ടുമാണ് പണം നല്കിയതെന്ന് നേരത്തേതന്നെ വ്യക്തമാക്കിയിരുന്നതാണ്. മുഖ്യമന്ത്രിക്ക് 2021 ജൂലായ് 27-ന് നല്കിയ പരാതിയിലും ഇതേത്തുടര്ന്ന് പോലീസെടുത്ത എഫ്.ഐ.ആറിലും ഇക്കാര്യം സൂചിപ്പിച്ചിരുന്നു. ആറുപേര് ചേര്ന്നാണ് 10 കോടി രൂപ മോന്സന് നല്കിയത്. അതില് ഒരാളോടു മാത്രമാണ് കണക്ക് ആവശ്യപ്പെട്ടതെന്നും ഷമീര് പറയുന്നു.
