കോട്ടയം : ജില്ലയിലെ എരുമേലിയിലെ നിർദിഷ്ട ശബരിമല ഗ്രീൻഫീൽഡ് വിമാനത്താവള പദ്ധതിക്കു വേണ്ട അനുമതികൾ ബന്ധപ്പെട്ട മന്ത്രാലയങ്ങൾ എത്രയും വേഗം നൽകി പദ്ധതി നടപ്പിലാക്കണമെന്ന് ആന്റോ ആന്റണി എംപി ചട്ടം 377 പ്രകാരം ലോക് സഭയിൽ ആവശ്യപ്പെട്ടു. രാജ്യത്തെ ഏറ്റവും വലിയ തീർത്ഥാടന കേന്ദ്രങ്ങളിലൊന്നായ ശബരിമലയിലേക്കുള്ള കണക്റ്റിവിറ്റി വർദ്ധിപ്പിക്കുന്നതിന് എരുമേലിക്ക് സമീപമുള്ള ഈ പദ്ധതി സഹായകമാകും. സിവിൽ ഏവിയേഷൻ മന്ത്രാലയം 2023 ഏപ്രിലിൽ “സൈറ്റ് ക്ലിയറൻസ്” അനുവദിച്ചു. പരിസ്ഥിതി, വനം, കാലാവസ്ഥാ വ്യതിയാന മന്ത്രാലയം 2023 ജൂലൈയിൽ ടേംസ് ഓഫ് റഫറൻസ് (ToR) നൽകി.
പ്രവർത്തനക്ഷമമാകുന്നതോടെ വിമാനത്താവളം വിനോദ സഞ്ചാരത്തെ ഗണ്യമായി ഉത്തേജിപ്പിക്കുകയും ദശലക്ഷക്കണക്കിന് ശബരിമല തീർത്ഥാടകർക്ക് തടസ്സമില്ലാത്ത യാത്ര സുഗമമാക്കുകയും പത്തനംതിട്ട, ഇടുക്കി, ആലപ്പുഴ, അയൽ പ്രദേശങ്ങൾ എന്നിവിടങ്ങളിൽ സാമ്പത്തിക വളർച്ച പ്രോത്സാഹിപ്പിക്കുകയും ചെയ്യും. കൂടാതെ ഈ ജില്ലകളിൽ ധാരാളം പ്രവാസികളുണ്ട്. അവർക്ക് മെച്ചപ്പെട്ട വ്യോമയാന കണക്റ്റിവിറ്റി അടിയന്തിര ആവശ്യമാണ്. വിമാനത്താവളം തമിഴ്നാടിന്റെ ചില ഭാഗങ്ങൾക്കും പ്രയോജനം ചെയ്യും. ഇത് മികച്ച പ്രാദേശിക സംയോജനവും വികസനവും ഉറപ്പാക്കുന്നു. ഈ നിർണായക അടിസ്ഥാന സൗകര്യ പദ്ധതിയുടെ നിർവ്വഹണം വേഗത്തിലാക്കാൻ ബന്ധപ്പെട്ട മന്ത്രാലയങ്ങൾ അനുമതികൾ നൽകി പദ്ധതി യാഥാർഥ്യമാക്കണം ആന്റോ ആന്റണി എംപി ആവശ്യപെട്ടു.
