കൊച്ചി : എംജി, കേരള സര്വകലാശാലകളില് അധ്യാപക നിയമനത്തിനായി യുജിസി മാനദണ്ഡങ്ങള് ലംഘിച്ച് ഉന്നത വിദ്യാഭ്യാസ വകുപ്പ് ഇറക്കിയ ഉത്തരവ് പിന്വലിച്ചു . എംഎസ്സി ബയോ ടെക്നോളജി പാസായവര്ക്ക് എംഎസ്സി ബോട്ടണി, സൂവോളജി അധ്യാപക തസ്തികയിലേക്ക് അപേക്ഷിക്കാന് അനുമതി നല്കിയ ഉത്തരവാണ് ഗവര്ണറുടെ നിര്ദേശ പ്രകാരം മരവിപ്പിച്ചത്.
എംഎസ്സി ബയോ ടെക്നോളജി പാസായവര്ക്ക് എംഎസ്സി സൂവോളജി, ബോട്ടണി അധ്യാപക തസ്തികയിലേക്ക് അപേക്ഷിക്കാന് അനുമതി നല്കികൊണ്ടുള്ള ഉത്തരവ് കഴിഞ്ഞ മാസമാണ് പുറത്തിറങ്ങിയത്. സര്വകലാശാലകളുടെ എതിര്പ്പ് മറികടന്ന് ഉന്നത വിദ്യാഭ്യാസ മന്ത്രിയുടെ ഓഫിസ് ഇടപ്പെട്ടായിരുന്നു തീരുമാനം. സര്വകലാശാലകള് എതിര്ത്തതോടെ ഉന്നത വിദ്യാഭ്യാസ കൗണ്സില് വിളിച്ച് ചേര്ത്ത് അനുകൂല റിപ്പോര്ട്ട് ലഭ്യമാക്കിയ ശേഷമായിരുന്നു നടപടി. സര്വകലാശാല അക്കാദമിക് സമിതികള് ചര്ച്ച ചെയ്ത് തീരുമാനിക്കേണ്ട വിഷയം തീരുമാനിച്ചതിലെ ചട്ടലംഘനം മുന് നിര്ത്തിയാണ് നടപടി.
സര്വകലാശാലകളുടെ സ്വയംഭരണാവകാശത്തിന്മേലുള്ള കടന്നുകയറ്റമാണെന്ന് തീരുമാനമെന്നാരോപിച്ച് സേവ് യൂണിവേഴ്സിറ്റി കാമ്പയിന് കമ്മിറ്റിയും രംഗത്തെത്തി. ഉത്തരവ് പിന്വലിക്കണമെന്നാവശ്യപ്പെട്ട് അധ്യാപക സംഘടനകളും, വിദ്യാര്ഥികളും ചാന്സലര് കൂടിയായ ഗവര്ണര്ക്കും ഉന്നത വിദ്യാഭ്യാസ മന്ത്രിക്കും പരാതി നല്കി. ഇതിന്റെ തുടര്ച്ചയാണ് ഉത്തരവ് മരവിപ്പിക്കാനുള്ള തീരുമാനം. സര്ക്കാര് തീരുമാനത്തിനെതിരെ ഇടത് അധ്യാപക സംഘടനകള് ഉള്പ്പെടെ രംഗത്തെത്തിയിരുന്നു. ആക്ഷന് കൗണ്സില് രൂപീകരിച്ച് സമരം ആരംഭിക്കാനിരിക്കെയാണ് ഉന്നത വിദ്യാഭ്യാസ വകുപ്പിന്റെ നിയമനം തടഞ്ഞുകൊണ്ടുള്ള ഉത്തരവ് ഇറക്കിയത്. ഇതും സംശയത്തിന്റെ നിഴലിലൂടെയാണ് ബന്ധപ്പെട്ടവര് കാണുന്നത്.
