തിരുമൂലപുരം : അധ്യാപകനായ നൗഷാദ് കൊടുവള്ളിയുടെ ശിക്ഷണത്തിൽ അറബിക് കലോത്സവത്തിൽ ഓവറോൾ ചാമ്പ്യൻഷിപ് നേടിയിരിക്കുകയാണ് കോന്നി ഗവണ്മെന്റ് ഹയർസെക്കൻഡറി സ്കൂൾ. ഇരുപത്തിരണ്ട് വിദ്യാർത്ഥികളെ ഒരേ പോലെ പരിശീലിപ്പിച്ച് ജില്ലാ കലോത്സവ വേദിയിൽ ഒന്നാം സ്ഥാനം വാരി കൂട്ടിയ ഈ അധ്യാപകന്റെയും വിദ്യാർത്ഥികളുടെയും പരിശ്രമം ചെറുതല്ല. അറബിക് സംഘഗാനം, നാടകം, മോണോ ആക്റ്റ്, കഥാപ്രസംഗം, കവിത അന്താക്ഷരി തുടങ്ങി പത്തൊൻപത് മത്സര ഇനങ്ങളിൽ പതിമൂന്ന് ഒന്നാം സ്ഥാനങ്ങൾ ആണ് കോന്നി ഗവണ്മെന്റ് ഹയർ സെക്കണ്ടറി സ്കൂൾ നേടിയത്.
മൂന്ന് മാസത്തോളം നീണ്ട പരിശീലനം ആണ് വിദ്യാർത്ഥികളെ ഈ നിലയിൽ പ്രാപ്തരാക്കി തീർത്തത്. ഇതിന് നേതൃത്വം വഹിച്ച അധ്യാപകനാണ് നൗഷാദ് കൊടുവള്ളി. കോഴിക്കോട് കൊടുവള്ളി സ്വദേശിയായ ഇദ്ദേഹം പതിനഞ്ച് വർഷങ്ങൾക്ക് മുൻപ് അടൂർ ബി എഡ് കോളേജിൽ അധ്യാപക പഠനം പൂർത്തിയാക്കുവാൻ ആണ് പത്തനംതിട്ട ജില്ലയിൽ എത്തിയത്. പഠനത്തിന് ശേഷം ജില്ലയിൽ എരുമേലി, അടൂർ തുടങ്ങിയ സ്കൂളുകളിൽ ജോലി ചെയ്ത ശേഷം കോന്നി ഗവണ്മെന്റ് ഹയർ സെക്കണ്ടറി സ്കൂളിൽ ജോലിയിൽ പ്രവേശിക്കുകയായിരുന്നു. അഞ്ച് വർഷമായി കോന്നിയിൽ ജോലി ചെയ്യുന്നു.
