തിരുവനന്തപുരം: ഗവര്ണര്ക്കെതിരെ വീണ്ടും പ്രമേയം പാസാക്കി കേരള സര്വകലാശാല സെനറ്റ്. സെനറ്റില് 50 പേര് പ്രമേയത്തെ അനുകൂലിച്ചപ്പോള് ഏഴു പേര് എതിര്ത്തു. ഗവര്ണര് രണ്ടംഗ സെര്ച്ച് കമ്മിറ്റി രൂപീകരിച്ചത് ചട്ടവിരുദ്ധമാണെന്ന് സെനറ്റ് വ്യക്തമാക്കി. സെര്ച്ച് കമ്മിറ്റി നോട്ടിഫിക്കേഷന് പിന്വലിക്കണമെന്നും പ്രമേയം ആവശ്യപ്പെട്ടു. ഗവര്ണര് നോട്ടിഫിക്കേഷന് പിന്വലിച്ചശേഷം സെനറ്റ് പ്രതിനിധിയെ തിരഞ്ഞെടുക്കാം എന്നാണ് അവര് ഇന്നു സ്വീകരിച്ച നിലപാട്.
ഗവര്ണര് പുറത്താക്കിയ 15 സെനറ്റ് അംഗങ്ങള് ഇന്നു ചേര്ന്ന യോഗത്തില് പങ്കെടുത്തില്ല. ഇതില് 2 പേര് സിപിഎമ്മിന്റെ സിന്ഡിക്കറ്റ് അംഗങ്ങളാണ്. സെനറ്റ് പ്രതിനിധിയെ ഒഴിവാക്കി ഗവര്ണര് ഏകപക്ഷീയമായി സേര്ച്ച് കമ്മിറ്റി രൂപീകരിച്ചത് സര്വകലാശാലാ ചട്ടങ്ങള്ക്കു വിരുദ്ധമാണെന്നും കമ്മിറ്റിയുടെ രൂപീകരണം റദ്ദാക്കണമെന്നും ആവശ്യപ്പെട്ടുള്ള പ്രമേയം ഓഗസ്റ്റില് ചേര്ന്ന സെനറ്റ് യോഗം അംഗീകരിച്ചിരുന്നു. ഈ പ്രമേയം ഗവര്ണര്ക്കു വിസി അയച്ചു കൊടുത്തെങ്കിലും അദ്ദേഹത്തിന്റെ ഭാഗത്തു നിന്നു തുടര് നടപടികള് ഒന്നും ഉണ്ടായില്ല. ഇതോടെയാണ് സെനറ്റ് രണ്ടാമതും പ്രമേയം പാസാക്കിയത്.
