കൊയിലാണ്ടി : അരിക്കുളം പഞ്ചായത്തിലെ കാരയാടിൽനിന്നും കല്ലറയും മൺഭരണികളും കണ്ടെത്തി. കാരയാട് കാളിയത്ത് മുക്ക് ഉമ്മിണിയത്ത് മീത്തൽ എന്ന സ്ഥലത്ത് കുഴിയെടുക്കുന്നതിനിടയിലാണ് പുരാതനകാലത്തെ നന്നങ്ങാടികളും മൺപാത്രങ്ങളും കല്ലറകളും കണ്ടെത്തിയത്.
ചെട്ട്യാംകണ്ടി ഷനിലിന്റെ സ്ഥലത്ത് നിന്നാണ് പുരാവസ്തുക്കൾ കണ്ടെത്തിയത്. ശനിയാഴ്ച വൈകീട്ടോടെയാണ് കമനീയമായ ഭരണികളും നന്നങ്ങാടികളും കണ്ടെത്തിയത്. വിവരമറിഞ്ഞ് ധാരാളമാളുകൾ സ്ഥലത്തെത്തി. റവന്യൂ അധികൃതരും മേപ്പയ്യൂർ പോലീസും സ്ഥലത്തെത്തിയിരുന്നു.
ആർക്കിയോളജിക്കൽ വകുപ്പിനെ വിവരം അറിയിച്ചിട്ടുണ്ട്. അടുത്തദിവസം തന്നെ അവർ സ്ഥലത്തെത്തി പരിശോധന നടത്തും. കൂടുതൽ പരിശോധനയ്ക്ക് ശേഷം മാത്രമേ കണ്ടെത്തിയ വസ്തുക്കളുടെ കാലപ്പഴക്കത്തെ പറ്റിയും മറ്റു വിവരങ്ങളും ലഭ്യമാകുകയുള്ളൂ.
