കൊച്ചി : സി.ബി.എസ്.ഇ അംഗീകാരമില്ലാത്ത തോപ്പുംപടി അരൂജാ ലിറ്റില് സ്റ്റാര് സ്കൂളിലെ വിദ്യാര്ഥികള്ക്ക് പത്താം ക്ലാസ് പരീക്ഷ എഴുതാന് ഉപാധികളോടെ ഹൈക്കോടതി അനുമതി നല്കി. ഇനിയുള്ള പരീക്ഷകള് എഴുതാനാണ് അനുമതി നല്കിയിരിക്കുന്നത്.
മാര്ച്ച് 4, 14,18 എന്നീ തീയതികളില് നടക്കുന്ന പരീക്ഷകളാണ് വിദ്യാര്ഥികള്ക്ക് എഴുതാന് സാധിക്കുക. പരീക്ഷാ ഫലം പ്രഖ്യാപിക്കുന്നത് കേസിന്റെ അന്തിമ വിധിക്ക് ശേഷമായിരിക്കുമെന്നും കോടതി അറിയിച്ചു.
അരൂജാസ് സ്കൂളിന് അടിസ്ഥാന സൗകര്യങ്ങള് ഇല്ലെന്ന് സി.ബി.എസ്.ഇ ഹൈക്കോടതിയെ അറിയിച്ചു. ഒരു വീട്ടില് ആണ് സ്കൂള് നടത്തുന്നത്. സി.ബി.എസ്.ഇ സ്കൂളുകള്ക്കെതിരായ സംസ്ഥാന സര്ക്കാരിന്റെ തെറ്റായ സമീപനമാണ് ഇത്തരം പ്രശ്നങ്ങള്ക്ക് കാരണം. അരൂജാസ് സ്കൂളിലെ കുട്ടികളെ ചട്ടവിരുദ്ധമായി പരീക്ഷക്ക് ഇരുത്താന് ശ്രമിച്ച മൂന്നു സ്കൂളുകള്ക്ക് എതിരെ നടപടി സ്വീകരിക്കുമെന്നും സി.ബി.എസ്.ഇ അറിയിച്ചു.
സി.ബി.എസ്.ഇ അംഗീകാരമില്ലാത്തതിനാല് കൊച്ചി മൂലങ്കുഴി അരൂജാസ് സ്കൂളിലെ 28 വിദ്യാര്ഥികള്ക്ക് ഫെബ്രുവരി 24, 26, 29 തീയതികളിലെ പരീക്ഷകള് എഴുതാന് കഴിഞ്ഞിരുന്നില്ല. ശേഷിക്കുന്ന പരീക്ഷകള് എഴുതാന് അനുമതി നല്കണമെന്നാവശ്യപ്പെട്ട് വിദ്യാര്ഥികള് ഹൈക്കോടതിയെ സമീപിക്കുകയായിരുന്നു.
