മുംബൈ : ഭര്‍ത്താവും സുഹൃത്തും ചേര്‍ന്ന് യുവതിയെ കൂട്ടബലാത്സംഗത്തിന് വിധേയമാക്കിയതായി പരാതി. സ്ത്രീയുടെ പരാതിയില്‍ എഫ്.ഐ.ആര്‍ രജിസ്റ്റര്‍ ചെയ്തതിന് പിന്നാലെ ഇരുവരും അറസ്റ്റിലായി. മുംബൈയിലാണ് സംഭവം. വെള്ളിയാഴ്ച വൈകീട്ട് പിറന്നാളാഘോഷമുണ്ടെന്ന പേരില്‍ യുവതിയെ ഭര്‍ത്താവ് കൂട്ടിക്കൊണ്ടുപോകുകയായിരുന്നു. രാത്രി എട്ടരയോടെ പ്രതിയും യുവതിയും സുഹൃത്തിന്‍റെ ഫ്ലാറ്റിലെത്തി.
ഇരുവരും മദ്യപിച്ച ശേഷം യുവതിയെ ബലാത്സംഗത്തിനിരയാക്കുകയായിരുന്നു. സംഭവം പുറത്തു പറഞ്ഞാല്‍ ഗുരുതര പ്രത്യാഘാതങ്ങള്‍ അനുഭവിക്കേണ്ടിവരുമെന്ന് ഭീഷണിപ്പെടുത്തുകയും ചെയ്തു. രാത്രി 11ഓടെ യുവതിയും ഭര്‍ത്താവും തിരിച്ച്‌ വീട്ടിലെത്തി. എന്നാല്‍ പീഡനത്തിനിരയായ യുവതി സംഭവം അടുത്ത ബന്ധുവിനോട് വെളിപ്പെടുത്തി.
അവര്‍ മറ്റു ബന്ധുക്കളെ വിവരം അറിയിക്കുകയും ചെയ്തു. തുടര്‍ന്ന്, ശനിയാഴ്ച രാവിലെ യുവതി ഭര്‍ത്താവിനും സുഹൃത്തിനുമെതിരെ പോലീസ് സ്റ്റേഷനിലെത്തി പരാതി നല്‍കുകയായിരുന്നു. ശേഷം യുവതിയെ മെഡിക്കല്‍ പരിശോധനക്ക് വിധേയമാക്കി. കൂട്ടബലാത്സംഗം, ക്രിമിനല്‍ ഗൂഡാലോചന എന്നീ കുറ്റങ്ങള്‍ ചുമത്തിയാണ് ഭര്‍ത്താവിനെയും സുഹൃത്തിനെയും പോലീസ് അറസ്റ്റ് ചെയ്തത്.
