ദില്ലി: ഡല്ഹിയില് കനത്ത മഴ തുടരുകയും വെള്ളക്കെട്ട് ജനജീവിതം ദുസഹമാക്കുകയും ചെയ്ത സാഹചര്യത്തില് സര്ക്കാരിനെതിരെ ഉയരുന്ന ആരോപങ്ങളില് പ്രതികരിച്ച് ഡല്ഹി മുഖ്യമന്ത്രി അരവിന്ദ് കെജ്രിവാള്. ഡല്ഹി നിവാസികള് നഗരത്തിലെ വാട്ടര് ഡ്രെയിനേജ് സംവിധാനത്തിന്റെ കാര്യക്ഷമതയെ ചോദ്യം ചെയ്ത സാഹചര്യത്തിലാണ് കെജ്രിവാളിന്റെ പ്രതികരണം. നഗരത്തിലെ സംവിധാനങ്ങള് ഇത്രയും ശക്തമായ മഴ നേരിടാന് രൂപകല്പ്പന ചെയ്തിട്ടുള്ളതല്ലായിരുന്നുവെന്നാണ് കെജ്രിവാള് പറഞ്ഞു. ഇതിനാലാണ് പ്രധാന റോഡുകളും വീടുകളും വെള്ളത്തിനടിയിലായതും ഗതാഗതം തടസ്സപ്പെട്ടതും. ഇത് പരസ്പരം വിരല് ചൂണ്ടേണ്ട സമയമല്ല. ദുരിതബാധിതരായ എല്ലാ സംസ്ഥാനങ്ങളിലെയും സര്ക്കാരുകള് പൊതുജനങ്ങളെ സഹായിക്കാന് ഒരുമിച്ച് പ്രവര്ത്തിക്കേണ്ടതുണ്ടെന്നും അദ്ദേഹം പറഞ്ഞു.
ഡല്ഹിയില് കനത്ത മഴ തുടരുന്ന സാഹചര്യത്തില് സ്ഥിതിഗതികള് വിലയിരുത്താന് ചേര്ന്ന ഉന്നതതല യോഗത്തിന് ശേഷമാണ് എഎപി മേധാവിയുടെ പ്രസ്താവന. ജൂലൈ 8-9 തീയതികളില് നഗരത്തില് 153 മില്ലിമീറ്റര് മഴ പെയ്തതായും അദ്ദേഹം പറഞ്ഞു. ഡല്ഹിയിലെ വെള്ളപ്പൊക്ക സാധ്യതയെക്കുറിച്ചും അദ്ദേഹം സംസാരിച്ചു. യമുന നദി ഡല്ഹിയില് 203.58 മീറ്റര് ജലനിരപ്പിലാണ് ഒഴുകുന്നത്. നാളെ രാവിലെ അത് 205.5 മീറ്ററിലെത്തുമെന്നാണ് പ്രതീക്ഷിക്കുന്നത്. കാലാവസ്ഥാ പ്രവചനമനുസരിച്ച് യമുനയിലെ ജലനിരപ്പ് ഇനിയും അധികം ഉയരില്ലെന്നാണ് പ്രതീക്ഷിക്കുന്നത്. യമുന 206 മീറ്റര് മാര്ക്ക് കടന്നാല് നദിയുടെ തീരത്ത് ഒഴിപ്പിക്കല് ആരംഭിക്കുമെന്നും അദ്ദേഹം വ്യക്തമാക്കി.