പത്തനാപുരം:ജനങ്ങളുടെ മനസ്സറിഞ്ഞുകൊണ്ടുള്ള പ്രവർത്തനങ്ങളാണ് കെ ബി ഗണേഷ് കുമാർ തൻ്റെ മണ്ഡലത്തിൽ നടപ്പിലാക്കുന്നത്. ജാതി- മത- രാഷ്ട്രീയ ഭേദമില്ലാത്ത പ്രവർത്തിക്കുന്ന ജനപ്രതിനിധിയാണ് ഗണേഷെന്ന് മണ്ഡലത്തിലെ ജനങ്ങളും സാക്ഷ്യപ്പെടുത്തുന്നു. പത്തനാപുരം മണ്ഡലത്തിൽ അദ്ദേഹം മത്സരിക്കുന്ന സമയങ്ങളിൽ രാഷ്ട്രീയം മാറ്റിവച്ച് ജനങ്ങൾ അദ്ദേഹത്തിൻ്റെ വിജയത്തിനു വേണ്ടി പ്രവർത്തിക്കുന്നതും മറ്റൊന്നും കൊണ്ടല്ല. മണ്ഡലത്തിലെ പ്രശ്നങ്ങൾ കണ്ടറിഞ്ഞ്, അതിന് പരിഹിരം നിർദ്ദേശിച്ച്, ആ നിർദ്ദേശങ്ങൾ കൃത്യമായി നടപ്പിലാക്കാൻ അദ്ദേഹത്തിന് കഴിയുന്നുണ്ട്.
വീടില്ലാതെ വിഷമിക്കുന്ന യുവതിയേയും മകനെയും ആശ്വസിപ്പിക്കുകയും അവർക്കു വേണ്ട സഹായങ്ങൾ നൽകാൻ സന്നദ്ധനാകുകയും ചെയ്യുന്ന കെബി ഗണേഷ് കുമാറിൻ്റെ വീഡിയോ ഇപ്പോൾ സമുഹമാധ്യമങ്ങളിൽ തരംഗം തീർക്കുകയാണ്. കുട്ടിയെ ചേർത്തുപിടിച്ച് ആശ്വസിപ്പിച്ച് എല്ലാം നമുക്ക് ശരിയാക്കാമെന്ന് അദ്ദേഹം വാക്കു നൽകുകയാണ്. അതൊരു വാക്ക് മാത്രമല്ല അടുത്ത ആഴ്ച പണി ആരംഭിക്കണമെന്നുള്ള നിർദ്ദേശം കൂടെ നിൽക്കുന്നവർക്കും അദ്ദേഹം നൽകുന്നൃണ്ട്. പത്തനാപുരം കമുംകുംചേരി സ്വദേശിയായ അഞ്ജുവിനും ഏഴാം ക്ലാസ് വിദ്യാർത്ഥിയായ മകൻ അർജുനും വീടൊരുക്കാനാണ് അദ്ദേഹം രംഗത്തിറങ്ങിയിരിക്കുന്നത്.
വീട് മാത്രമല്ല കുട്ടിയ്ക്ക് പഠിക്കാനുള്ള സൗകര്യം ഒരുക്കുമെന്നും ഗണേഷ് കുമാർ വാഗ്ദാനം ചെയ്യുന്നുണ്ട്. ഇതിൻ്റെ വീഡിയോ സോഷ്യൽ മീഡിയയിൽ തരംഗമായിക്കഴിഞ്ഞു. ‘നിനക്ക് എവിടംവരെ പഠിക്കണോ അവിടംവരെ പഠിക്കാം. ഞാൻ പഠിപ്പിക്കും´ എന്നാണ് അദ്ദേഹം കുട്ടിക്ക് വാക്ക് നൽകുന്നത്. എൻ്റെ നാലാമത്തെ കുട്ടിയെപ്പോലെ ഇവനെ ഞാൻ നോക്കുമെന്നും എൻ്റെ സ്വപ്നത്തിൽ ഇവൻ സിവിൽ സർവീസൊക്കെ പാസായി മിടുക്കനായി വരുന്നത് കാണാമെന്നും കുട്ടിയോടും അവിടെ കൂടി നിൽക്കുന്നവരോടും ഗണേഷ് കുമാർ പറയുന്നു. മുന്നിൽ ശൂന്യതമാത്രം കണ്ടുകൊണ്ടിരുന്ന സാഹചര്യത്തിലാണ് അർജുനെ ചേർത്തുപിടിച്ചുകൊണ്ട് എംഎൽഎ വാക്ക് നൽകിയത്.
സാഹചര്യത്തിൻ്റെ സമ്മർദ്ദം കൊണ്ടാകണം എംഎൽഎ ചേർത്തുപിടിച്ചതോടെ കുട്ടി കരയുന്നതും വീഡിയോയിൽ കാണാം. ഇതു കണ്ട് ഗണേഷ് കുമാർ അവനെ ആശ്വസിപ്പിക്കുന്നുണ്ട്. തുടർന്ന് നന്നായി പഠിക്കണമെന്ന് അവനോടു പറയുകയും ചെയ്യുന്നുണ്ട്. വീടുപണിക്കായി എല്ലാവരും ആത്മാർത്ഥമായി ശ്രമിക്കണമെന്ന് നാട്ടുകാരോടും ഒപ്പമുണ്ടായിരുന്ന പാർട്ടി പ്രവർത്തകരോടും നിർദ്ദേശിച്ചിട്ടാണ് അദ്ദേഹം രംഗം വിടുന്നത്.
