കോഴിക്കോട്: ഷാര്‍ജ-കോഴിക്കോട് എയര്‍ ഇന്ത്യ എക്സ്പ്രസിലെ യാത്രക്കിടെ ഉണ്ടായ ദുരനുഭവം പങ്കുവെച്ച് സാമൂഹിക പ്രവര്‍ത്തകന്‍ അഷ്റഫ് താമരശ്ശേരി. 15 ദിര്‍ഹം നല്‍കി (ഏകദേശം 337 ഇന്ത്യന്‍ രൂപ) വിമാനത്തില്‍നിന്ന് വാങ്ങിയ ബിരിയാണിയുടെ വിഡിയോ സഹിതമാണ് അദ്ദേഹം ഫേസ്ബുക്കില്‍ കുറിപ്പിട്ടത്. പ്ലാസ്റ്റിക് പാത്രത്തിലുള്ള ബിരിയാണിയില്‍ വെള്ളം നിറഞ്ഞ നിലയിലായിരുന്നു. ഇത് ന്യായമോ, അന്യായമോയെന്നും അദ്ദേഹം കുറിപ്പില്‍ ചോദിച്ചു.
337 രൂപ കൊടുത്ത് മേടിച്ച് ഒരു ബിരിയാണിയുടെ അവസ്ഥയാണ് അദ്ദേഹം വീഡിയോയിലൂടെ കാണിച്ചു തരുന്നത്. അതും നമ്മുടെ നാട്ടില്‍ നിരോധിച്ച പ്ലാസ്റ്റിക്ക് പാത്രത്തിലാണ് ബിരിയാണി നല്‍കുന്നതെന്നും അദ്ദേഹം വീഡിയോയില്‍ പറയുന്നുണ്ട്. അതേസമയം, അഷ്റഫ് താമരശ്ശേരിക്കുണ്ടായ ദുരനുഭവത്തില്‍ മാപ്പ് പറഞ്ഞ് എയര്‍ ഇന്ത്യ എക്സ്പ്രസ് ആന്‍ഡ് എയര്‍ ഏഷ്യ ഇന്ത്യ രംഗത്ത് വന്നു. ‘ഹലോ അഷ്റഫ്, താങ്കള്‍ക്കുണ്ടായ നിരാശജനകമായ അനുഭവത്തില്‍ ഞങ്ങള്‍ മാപ്പ് പറയുന്നു. നിങ്ങള്‍ക്ക് ഈ അനുഭവമുണ്ടാകുന്നത് ഞങ്ങള്‍ ഇഷ്ടപ്പെടുന്നില്ല. നിങ്ങളുടെ ബുക്കിങ് വിവരങ്ങള്‍ ഞങ്ങള്‍ക്ക് സ്വകാര്യ സന്ദേശമായി അയക്കുക. അക്കാര്യം ഞങ്ങള്‍ ഉടന്‍ പരിഹരിക്കും’ അഷ്റഫിന്റെ കുറിപ്പിന് താഴെ പോസ്റ്റ് ചെയ്ത കമന്റില്‍ എയര്‍ ഇന്ത്യ എക്സ്പ്രസ് വ്യക്തമാക്കി.
