ദിസ്പുര്: ആസാമില് നിന്നുള്ള എം.എല്.എ രകിബുല് ഹുസൈന് കോവിഡ് സ്ഥിരീകരിച്ചു. ആസാമില് കോവിഡ് പിടിപെടുന്ന ഏഴാമത്തെ എം.എല്.എയാണ് രകിബുല് ഹുസൈന്.
സെന്ട്രല് ആസാമിലെ സമഗുരി മണ്ഡലത്തിലെ എം.എല്.എയായ ഇദ്ദേഹം ഫേസ്ബുക്ക് പോസ്റ്റിലൂടെയാണ് തനിക്ക് കോവിഡ് സ്ഥിരീകരിച്ച വിവരം അറിയിച്ചത്. ഭാര്യ നസ്രീന് ഹുസൈനും രോഗം സ്ഥിരീകരിച്ചിട്ടുണ്ട്. എന്നാല് എം.എല്.എയുടെ മകന് നടത്തിയ പരിശോധനയില് കോവിഡ് ഇല്ലെന്ന് കണ്ടെത്തി.
”പരിശോധനയില് എനിക്ക് കോവിഡ് സ്ഥിരീകരിച്ചിട്ടുണ്ട്. കഴിഞ്ഞ നാല് ദിവസമായി ഞാനുമായി സമ്പര്ക്കത്തിലേര്പ്പെട്ടവര് പരിശോധനക്ക് വിധേയമാവണം” -എം.എല്.എ ഫേസ്ബുക്കില് കുറിച്ചു.
ആസാമിലെ മുന് മന്ത്രി കൂടിയായ രകിബുല് ഹുസൈന് സംസ്ഥാനത്ത് കോവിഡ് പിടിപെടുന്ന ആദ്യ കോണ്ഗ്രസ് എം.എല്.എയാണ്. അമിനുല് ഹഖ് ലാസ്കര്, അതുല് ബോറ, കൃഷ്ണേന്ദു പോള്, നര്യന് ദേക, ബോലിന് ചേതിയ, നബനിത ഹാന്ഡിക് എന്നിവരാണ് ആസാമില് കോവിഡ് ബാധിച്ച മറ്റ് ആറു പേര്. ഇവര് എല്ലാവരും ബി.ജെ.പി എം.എല്.എമാരാണ്.
അഖിലേന്ത്യാ മഹിള കോണ്ഗ്രസ് അധ്യക്ഷയും മുന് എം.പിയുമായ സുസ്മിത ദേവിന് നേരത്തേ കോവിഡ് സ്ഥിരീകരിച്ചിരുന്നു.