ന്യൂഡല്‍ഹി : സ്വത്തു ഭാഗം വയ്ക്കല്‍ കേസുകള്‍ അനന്തമായി നീട്ടരുതെന്ന് സുപ്രീംകോടതി. പ്രാഥമിക ഉത്തരവിനു ശേഷം കേസ് അനന്തമായി നീട്ടിവയ്ക്കുകയോ പ്രത്യേക വിചാരണയ്ക്ക് അപേക്ഷ നല്‍കണമെന്ന് ആവശ്യപ്പെടുകയോ ചെയ്യുന്ന പ്രവണത അവസാനിപ്പിക്കണമെന്നും കോടതി ആവശ്യപ്പെട്ടു. ചില സംസ്ഥാനങ്ങളില്‍ ഈ രീതിയുണ്ടെന്നു പറഞ്ഞ സുപ്രീം കോടതി, ഇക്കാര്യം വിചാരണക്കോടതികളെ അറിയിക്കാന്‍ വിധിപ്പകര്‍പ്പു ഹൈക്കോടതി രജിസ്റ്റ്രാര്‍ ജനറല്‍മാര്‍ക്കു നല്‍കാന്‍ നിര്‍ദേശിച്ചു. ജഡ്ജിമാരായ എസ്.അബ്ദുല്‍ നസീര്‍, വിക്രംനാഥ് എന്നിവരുള്‍പ്പെട്ട ബെഞ്ചിന്റേതാണു വിധി.
കോഴിക്കോട്ടെ കെ.ഇ.കരുണാകരന്റെ സ്വത്തുമായി ബന്ധപ്പെട്ട തര്‍ക്കത്തില്‍ വിചാരണക്കോടതിയുടെ വിധി കേരള ഹൈക്കോടതി റദ്ദാക്കി. ഈ നടപടി അസാധുവാക്കിയ സുപ്രീം കോടതി, വിചാരണക്കോടതി വിധി പുനഃസ്ഥാപിച്ചു. കരുണാകരന്റെ 4 മക്കളില്‍, ചിരുതക്കുട്ടിയെന്ന സ്ത്രീയില്‍ ജനിച്ച ദാമോദരനാണ് സുപ്രീം കോടതിയിലെത്തിയത്. രേഖാ മൂലമുള്ള തെളിവുകളുടെ അഭാവത്തിലും കരുണാകരനും ചിരുതക്കുട്ടിയും ഭാര്യാഭര്‍ത്താക്കന്മാരായി ജീവിച്ചിരുന്നുവെന്നു കണ്ടെത്തി വിചാരണക്കോടതി സ്വത്ത് തുല്യമായി വീതിച്ചിരുന്നു. ഇതിനെതിരെ കരുണാകരന്റെ മകന്‍ അച്യുതന്റെ മക്കള്‍ നല്‍കിയ ഹര്‍ജിയിലാണ് ഹൈക്കോടതി അനുകൂല വിധി നല്‍കിയത്.
