മല്ലപ്പള്ളി : മല്ലപ്പള്ളി – കോഴഞ്ചേരി റോഡിൽ മല്ലപ്പള്ളി വലിയ പാലത്തിന് സമീപമുള്ള കൊടും വളവിലെ വാഹനങ്ങളുടെ അമിതവേഗം അപകടത്തിന് വഴിയൊരുക്കുമോ എന്ന ആശങ്കയില് നാട്ടുകാർ. മല്ലപ്പള്ളി ടൗണിന് പുറത്ത് എപ്പോഴും തിരക്ക് അനുഭവപ്പെടുന്ന ഭാഗങ്ങളിൽ ഒന്നാണ് ഇത്. കൊടും വളവിന്റെ വശത്താണ് മല്ലപ്പള്ളി വില്ലേജ് ഓഫീസ് സ്ഥിതി ചെയ്യുന്നത്. ഹോട്ടലും ആശുപത്രിയും ഉൾപ്പെടെ നിരവധി സ്ഥാപനങ്ങൾ ഇവിടെ സ്ഥിതി ചെയ്യുന്നുണ്ട്. ഏത് നിമിഷവും അപകടം നടക്കുമോ എന്ന ആശങ്കയിലാണ് ഇവിടേക്ക് എത്തുന്ന ആളുകൾ റോഡ് മുറിച്ച് കടക്കുന്നതും വാഹനങ്ങൾ തിരിക്കുന്നതും.
മല്ലപ്പള്ളി ഭാഗത്ത് നിന്നും എത്തുന്ന വാഹനങ്ങൾക്ക് വളവിന് ശേഷമുള്ള ഭാഗം കാണാൻ കഴിയാത്തതും അപകട സാധ്യത വർദ്ധിപ്പിക്കുന്നു. വാഹനങ്ങൾ അമിതവേഗത കുറച്ചാൽ അപകടസാധ്യത വലിയ അളവിൽ കുറയ്ക്കാൻ സാധിക്കും. വളവിന് മുമ്പായി ആവശ്യമായ അകലത്തിൽ മുന്നറിയിപ്പ് ബോർഡുകൾ, റംമ്പിൾ സ്ട്രിപ്പുകൾ, സ്പീഡ് ലിമിറ്റ് ബോർഡുകൾ തുടങ്ങിയവയും വളവിന് ശേഷം കോഴഞ്ചേരി ഭാഗത്തേക്ക് പോകുന്ന റോഡില് ഇടത്ത് ഭാഗത്ത് സ്പീഡ് ബ്രേക്കർ സ്ഥാപിച്ചും റോഡ് സുരക്ഷ ഉറപ്പാക്കണമെന്ന് നാട്ടുകാർ ആവശ്യപ്പെട്ടു.
