റാന്നി : അത്തിക്കയം- കടുമീന്ചിറ കിഴക്കേഭാഗം റോഡിലെ കുഴിയില് വീണ് ബൈക്ക് യാത്രക്കാരിക്ക് പരിക്ക്. നാറാണംമൂഴി പഞ്ചായത്ത് വക കമ്മ്യൂണിറ്റി കിച്ചണിലെ ജീവനക്കാരിക്കാണ് പരിക്കേറ്റത്. എസ്.എന് സ്കൂളില് പ്രവര്ത്തിക്കുന്ന കൊവിഡ് ഫസ്റ്റ് ലൈന് ട്രീറ്റ്മെന്റ് സെന്ററിലേക്ക് ആഹാരവുമായി പോകുന്നതിനിടെയായിരുന്നു അപകടം. കാലിന് പരിക്കേറ്റ യുവതി ചികിത്സ നേടി.
റോഡിന്റെ തകര്ച്ചയെപ്പറ്റി നിരവധി പരാതികള് നല്കിയെങ്കിലും അധികൃതരുടെ ഭാഗത്തുനിന്നും മെല്ലെപ്പോക്ക് നയമാണ് സ്വീകരിക്കുന്നതെന്നാണ് നാട്ടുകാരുടെ ആരോപണം. കേരള പുനര്നിര്മ്മാണ പദ്ധതി പ്രകാരം എസ്റ്റിമേറ്റ് തയ്യാറാക്കി പോയിട്ടുണ്ടെങ്കിലും ആദ്യഘട്ട നിര്മ്മാണം തുടങ്ങുന്ന റാന്നിയിലെ റോഡുകളുടെ പട്ടികയില് അത്തിക്കയം -കടുമീന്ചിറ റോഡ് ഉള്പ്പെടുത്തിയിട്ടില്ല. ഗുരുമന്ദിരം പടിയിലെ കയറ്റത്തില് നിരവധി വാഹനങ്ങളാണ് ദിവസവും അപകടത്തില്പ്പെടുന്നത്. പൊതുമരാമത്ത് വകുപ്പ് മന്ത്രിക്കും മുഖ്യമന്ത്രിക്കും പരാതി അയച്ചിട്ടും നടപടി ഉണ്ടായിട്ടില്ല.