കൊച്ചി : കര്‍ക്കിടമഴയില്‍ കുതിര്‍ന്ന് അത്തം എത്തി, ഇത്തവണയും അത്തംഘോഷയാത്രയില്ല. ഓണത്തിന്‍റെ വരവറിയിച്ചുള്ള തൃപ്പൂണിത്തുറ അത്തം ഘോഷയാത്ര ഇത്തവണയും മലയാളിയുടെ മനസ്സില്‍ മാത്രം. കോവിഡ് വ്യാപന സാഹചര്യത്തെ തുടര്‍ന്ന് അത്തം ഘോഷയാത്ര മാറ്റിവെച്ചെങ്കിലും പതിവ് തെറ്റിക്കാതെ അത്തം നഗറില്‍ ഇന്ന് അത്തപ്പതാക ഉയരും. ഓണം വിളംബരം ചെയ്യുന്ന സാംസ്ക്കാരികോത്സവം കൂടിയായ തൃപ്പൂണിത്തുറ അത്തച്ചമയം ഇത്തവണയും നിറക്കാഴ്ചകളില്ലാതെയാണ് കടന്നു പോവുന്നത്. മൂന്ന് വര്‍ഷം മുന്‍പുണ്ടായ പ്രളയമായിരുന്നു ഈ ചരിത്രപ്രസിദ്ധ ഘോഷയാത്ര ആദ്യം മുടക്കിയത്.
സര്‍വ്വ പ്രൗഢിയോടെ തൊട്ടടുത്ത വര്‍ഷം അത്തച്ചമയമൊരുക്കിയെങ്കിലും പിന്നീട് വന്ന കോവിഡ് മഹാമാരി കഴിഞ്ഞ വര്‍ഷത്തെ അത്താഘോഷങ്ങള്‍ക്കും വിലങ്ങിട്ടു. മഹാവ്യാധിയില്‍ നിന്നും കരകയറാത്തതിനാല്‍ ഇത്തവണയും രാജവീഥി ആഘോഷയാത്രകളില്ലാതെ വിജനമായിരിക്കും. പതിറ്റാണ്ടുകളായി തൃപ്പൂണിത്തുറ നഗരസഭയാണ് ഈ മതേതര ഉത്സവത്തിന്‍റെ സംഘാടനം നിര്‍വ്വഹിക്കുന്നത്. പ്രതിസന്ധികളെയെല്ലാം അതിജീവിച്ച്‌, വരും വര്‍ഷങ്ങളില്‍ പൂര്‍ണ്ണ പ്രതാപത്തോടെ തൃപ്പൂണിത്തുറ വീണ്ടും അത്തച്ചമയത്തിന് വേദിയാകുമെന്ന പ്രതീക്ഷയിലാണെന്ന് നഗരസഭ ചെയര്‍പേഴ്സണ്‍ രമ സന്തോഷ് പറഞ്ഞു.
അത്തം ഘോഷയാത്ര ഉപേക്ഷിച്ചെങ്കിലും പതിവ് തെറ്റിക്കാതെ അത്തം നഗറില്‍ ഇന്ന് അത്തപ്പതാക ഉയരും. ഇതിനു മുന്നോടിയായി തൃപ്പൂണിത്തുറ രാജകുടുംബ പ്രതിനിധിയില്‍ നിന്ന് നഗരസഭ ചെയര്‍പേഴ്സണ്‍ അത്തപ്പതാക ഏറ്റുവാങ്ങിയിരുന്നു. ചരിത്രത്തിലാദ്യമായി രാജകുടുംബത്തിലെ ഒരു വനിതാ പ്രതിനിധി, അത്തപ്പതാക നഗരസഭാധ്യക്ഷയ്ക്ക് കൈമാറിയത് ഇത്തവണത്തെ സവിശേഷതയാണ്.
