കൊച്ചി: എറണാകുളം ബ്രഹ്മപുരം മാലിന്യ പ്ലാന്റിലെ തീപിടിത്തവുമായി ബന്ധപ്പെട്ട് മേയറുടെ രാജിയാവശ്യപ്പെട്ട് ഡിസിസി നടത്തിയ കൊച്ചി കോര്പ്പറേഷന് ഉപരോധ സമരത്തിനിടെ ജീവനക്കാരെ മര്ദിച്ച കേസില് രണ്ട് യൂത്ത് കോണ്ഗ്രസ് നേതാക്കള് കൂടി അറസ്റ്റില്. സംസ്ഥാന സെക്രട്ടറി പി.വൈ ഷാജഹാന്, എറണാകുളം ബ്ലോക്ക് പ്രസിഡന്റ് സിജോ ജോസഫ് എന്നിവരെയാണ് സെന്ട്രല് പോലീസ് അറസ്റ്റ് ചെയ്തത്. കേസില് നേരത്തെ സംഘടനാ ഭാരവാഹിയായ ജെറിന് ജെസിനെ പോലീസ് അറസ്റ്റ് ചെയ്തിരുന്നു.
കോര്പറേഷന് ഉപരോധത്തിനിടെ ഓഫീസിലെത്തിയ ജീവനക്കാരെ കോണ്ഗ്രസ് പ്രവര്ത്തകര് ആക്രമിച്ചിരുന്നു. കോര്പറേഷന് സെക്രട്ടറി ബാബു അബ്ദുല് ഖാദറിനെയും ക്ലാര്ക്ക് വിജയകുമാറിനെയും വളഞ്ഞിട്ട് തല്ലി. രാവിലെ ഓഫീസിലെത്തിയ മറ്റൊരു ജീവനക്കാരനെ ഓടിച്ചിട്ട് ചവിട്ടുകയാണുണ്ടായത്. അതേസമയം ഉപരോധ സമരം നടത്തിയ ഡിസിസി പ്രസിഡന്റ് മുഹമ്മദ് ഷിയാസ് ഉള്പെടെയുള്ള 500 പേര്ക്കെതിരെയും പോലീസ് കേസെടുത്തിട്ടുണ്ട്.
