പാലക്കാട്: മോട്ടോർ വാഹന വകുപ്പിന്റെ പരിശോധനയിൽ നിന്ന് വെട്ടിച്ചു കടക്കാൻ ശ്രമിച്ച ബൈക്കിടിച്ച് വയോധികയ്ക്ക് പരിക്ക്. പെരിമ്പടാരി നെല്ലിക്കവട്ടയിൽ ജമീലയ്ക്കാണ് ബൈക്കിടിച്ച് പരിക്കേറ്റത്. കൊടക്കാട് പൊതുവച്ചോല മുഹമ്മദ് ഷാഫിയാണ് എംവിഡിയുടെ കണ്ണ് വെട്ടിച്ച് ബൈക്കിൽ കടക്കാൻ ശ്രമിച്ചത്.ശനിയാഴ്ച രാവിലെ 11 മണിയോടെയായിരുന്നു സംഭവം.കുമരംപുത്തൂർ താഴേചുങ്കത്താണ് അപകടമുണ്ടാവുന്നത്. റോഡ് മുറിച്ചുകിടക്കുന്നതിനിടയിൽ ജമീലയുടെ കാലിൽ ബൈക്കിടിക്കുകയായിരുന്നു.
ഇവരെ വട്ടമ്പലം സ്വകാര്യ ആശുപത്രിയിൽ പ്രവേശിപ്പിച്ചിരിക്കുകയാണ്. എല്ലിന് പൊട്ടലുണ്ടെന്നാണ് ലഭിക്കുന്ന വിവരം. കൈയ്ക്ക് പരിക്കേറ്റ മുഹമ്മദ് ഷാഫിയെയും ആശുപത്രിയിൽ പ്രവേശിപ്പിച്ചിരിക്കുകയാണ്. തിരക്കേറിയ ജംഗ്ഷനിൽ അനവസരത്തിലുള്ള പരിശോധനയാണ് അപകടത്തിന് കാരണമെന്ന് ആരോപിച്ച് നാട്ടുകാർ പ്രതിഷേധവുമായി രംഗത്തെത്തിയിരുന്നു. ഇതിന് പിന്നാലെ മോട്ടോർ വാഹനവകുപ്പിന്റെ വാഹനം നാട്ടുകാർ തടഞ്ഞു.
