അമൃത്സര്: പഞ്ചാബിലെ അമൃത്സറില് സുവര്ണ ക്ഷേത്രത്തിന് സമീപം സ്ഫോടനം. സുവര്ണ ക്ഷേത്രത്തിന് ഒരു കിലോമീറ്റര് അകലെ ഒരു ഹോട്ടലിന് സമീപത്ത് സ്ഫോടനമുണ്ടായത്. സ്ഫോടനത്തില് നിരവധി പേര്ക്ക് പരിക്കേറ്റു. സ്ഫോടനത്തിന്റെ കാരണം വ്യക്തമല്ല. ഫോറന്സിക് സംഘം സ്ഥലത്ത് പരിശോധന നടത്തുകയാണ്.
സ്ഫോടനത്തിന്റെ ആഘാതത്തില് സമീപത്തെ റസ്റ്റോറന്റിന്റെയും സാരഗര്ഹി സരായിന്റെയും ജനല് ചില്ലുകള് തകര്ന്നു. സംഭവത്തിന്റെ കൃത്യമായ കാരണം ഇതുവരെ കണ്ടെത്താനായിട്ടില്ലെന്ന് അഡീഷണല് ഡെപ്യൂട്ടി പോലീസ് കമ്മീഷണര് ഡോ.മെഹ്താബ് സിംഗ് പറഞ്ഞു. സമീപത്തെ കെട്ടിടങ്ങളുടെ ജനല്ചില്ലുകള് മാത്രമാണ് തകര്ന്നതെന്നും കെട്ടിടങ്ങള്ക്ക് കേടുപാടുകള് സംഭവിച്ചിട്ടില്ലെന്നും അദ്ദേഹം പറഞ്ഞു. സ്ഥിതി നിയന്ത്രണവിധേയമാണെന്നും പരിഭ്രാന്തരാകേണ്ട സാഹചര്യമില്ലെന്നും പോലീസ് അറിയിച്ചു.
