ന്യൂഡൽഹി : ഓസ്‌ട്രേലിയയുമായുള്ള ആദ്യ 2+2 മന്ത്രിതല ചർച്ചയ്ക്ക് ഇന്ന് ന്യൂഡൽഹിയിൽ ഇന്ത്യ ആതിഥേയത്വം വഹിക്കും. ഓസ്ട്രേലിയൻ വിദേശകാര്യ മന്ത്രി മാരിസ് പെയ്നും പ്രതിരോധ മന്ത്രി പീറ്റർ ഡട്ടനും ഇന്ത്യൻ വിദേശകാര്യ മന്ത്രി എസ്.ജയശങ്കർ, പ്രതിരോധ മന്ത്രി രാജ്നാഥ് സിങ് എന്നിവരുമായി കൂടിക്കാഴ്ച നടത്തും.
സാമ്പത്തിക സുരക്ഷ, സൈബർ, കാലാവസ്ഥ, സാങ്കേതികവിദ്യ, വിതരണ ശൃംഖല എന്നിവ ഉൾപ്പെടെയുള്ള വിഷയങ്ങള്‍ മന്ത്രിമാർ ചർച്ച ചെയ്യും. ഓസ്ട്രേലിയൻ വിദേശകാര്യമന്ത്രിയും പ്രതിരോധമന്ത്രിയും പ്രധാനമന്ത്രി നരേന്ദ്ര മോദിയെ അദ്ദേഹത്തിന്റെ 7 ലോക് കല്യാൺ മാർഗിലെ വസതിയിൽ വൈകിട്ട് 4:30ന് സന്ദർശിക്കും.
ദേശീയ യുദ്ധ സ്മാരകത്തിൽ പുഷ്പചക്രം അർപ്പിച്ച ശേഷം രാവിലെ ഹൈദരാബാദ് ഹൗസിൽ മാരിസ് പെയ്ന്‍ എസ്.ജയ്ശങ്കറിനെ സന്ദർശിക്കും. വൈകിട്ട് 3 മണിക്ക് ജവാഹർലാൽ നെഹ്റു ഭവനിലെ മുത്തമ്മ ഹാളിൽ നടക്കുന്ന പത്രസമ്മേളനത്തിലും അവർ പങ്കെടുക്കും.
